BAPHUME ngesamagundane kuhlasela imvula enamandla ehambisana nesivungungu somoya emcimbini kaKelvin Momo obizwa nge-One Man Show obusePeoples Park eMoses Mabhida eThekwini ngeSonto.
Injabulo iphele sekutatazelwa abanye sebekhosele nasemagumbini angasese ngenxa yesimo sezulu esiqale kungazelele eThekwini njengoba ngaphandle kwalo mcimbi siphinde sadala nomokalo kweminye yemigwaqo nezindawo ezingaphansi kwaleli dolobha.
Kulo mcimbi izinkumbi zabantu beziphume ngobuningi ukuzothokozela uKelvin Momo onguDJ ophinde abe ngumdidiyeli wezingoma kuleli oseke wasebenza nenqwaba yamanye amaciko.
Lo mcimbi uqale kahle nesimo sezulu sisasihle sisavumile kodwa ngokuhamba kwesikhathi kwashintsha ukwenza seliqala liguqubala.
Ngaleso sikhathi oDJ nabaculi okubalwa kubo uBenny Maverick, Shasha, Sykes, Xola TSM, Zee Nxumalo banye besajabulisa abathandi benjabulo ngezingoma zabo.
Ngesikhathi kuqala umonakalo wesimo sezulu bekusalindeleke ukuthi kunandise usingaye uKelvin Momo njengoba nguyena obekulindeleke ukuthi avale umcimbi ngegiya eliphezulu.
Imvulo ehambisana nomoya ihlasele ngamandla kwaphephuka amatende kwaphoqeleka izinkumbi zabantu ebezisajabula babalekele ukuzama ukuthola lapho bezokhosela khona.
Esitatimendeni esikhishwe ngabahleli balo mcimbi bachaze isimo sezulu njengesenzo soMdali nesibe ngaphezulu kokuhlela kwabo.
“Ngenxa yokuqinisekisa ukuphephan kwezihambeli zomcimbi senze konke okusemandleni ukusinisekisa ukuphepha kwabo ngoba ibona esibabeke eqhulwini ngesikhathi lesi simo sezulu sihlasela,” kusho isitatimende sabahleli balo mcimbi ogcine kuphoqeleka ukuthi umiswe.
UNkz Lulu Mqadi obebhekelela ezokuphepha kulo mcimbi uthe isinqumo sokumisa ukuqhubeka kwalo mcimbi abasithathelanga phansi kodwa bekuphoqa ukuqinisekisa ukuthi wonke umuntu obeyingxenye yalo mcimbi uyaphepha futhi azibikhona izigameko ezingagcina zidala umonakalo omkhulu.
Isitatimende sabahleli balo mcimbi siqhube ngokuthi basazoyikhipha eminye imininingwane ezohambisana nokuqhubeka noma ngokuzokwenzeka ngokuzayo mayelana nalo mcimbi.
