
UNDUNANKLU waKwaZulu-Natal, uMnu Thami Ntuli, ngokwegaqa lakhe njengowengamele ezokuPhepha koMphakathi, esifundazweni, uhole ithimba losigaxamabhande bamaphoyisa, bavakashela indawo yaseNseleni, eMhlathuze, ngaphansi kukaMasipala wesiFunda iKing Cetshwayo.
Bafike ekuseni namhlanje ngoLwesine, kanti baqale bahlangana namakhosi, izimeya, amakhansela, nabaholi bezenkolo, ngaphambi kokhuluma nomphakathi. Inhloso-ngqangi yalolu hambo, ukuqwashisa umphakathi ngokugebengu, okuthiwa buya ngokwanda kuleya ndawo, nasezindaweni ezizungeze iNseleni.
Isitatimende seHhovisi likaNdunankulu uNtuli sithi izigameko ezibikwayo, namacala avulwayo emaphoyiseni aseNseleni, ziyashaqisa.
“Ukudunwa kwezimoto, ukubulawa kwabantu, ukuhlukunyezwa kwezingane, ukudlwengulwa kwabesifazane, nentsha esiphenduke imilutha yezidakamizwa, okubikwa lapha eNseleni namaphehelo, yikhona okwenze undunankulu namasosha akhe basukuma bazobhula umlilo,” kusho isitatimende.
Imiphakathi yaseKing Cetshwayo, ikhuthazwe nokuthi ibhalisele ukuvota ngempelasonto, esiya kuyona. Umphathi wakwa-Electoral Commission of South Africa (IEC), esiFundeni iKing Cetshwayo, uNks Stella Dlamini, uthi sebemi ngomumo.
“Sesiqeqeshe abantu abazosiza abantu abazobhalisa ezikhungweni zokuvota. Abantu abazobe bemele amaqembu epolitiki (party agents), nabo sesibaqeqeshile, njengoba zingu-558 izikhungo zokuvota eKing Cetshwayo. Sizovula ngo-08h00 ekuseni, sivale ngo-05h00 ntambama, kuzo zombili izinsuku, ezikhungweni zokubhaliselwa ukuvota.
“UMasipala uMhlathuze yiwona onabantu abaningi ababhalisele ukuvota, ulandelwe ngowaseMlalazi, ulandelwe ngowaseMfolozi, kube ngowaseNkandla, kugcine owaseMthonjaneni,” kuchaza uNks Dlamini.







