SELUNGENE esigabeni sokubhekana nezikhulu ezithintekayo ekuguqiseni Ithala, uhlelo lokuvuselela ukusebenza kwaleli bhange, kulandela ukuqala kophenyo lweSpecial Investigating Unit (SIU).
Lokhu kudalulwe nguNdunankulu waKwaZulu-Natal, uMnu Thami Ntuli, ngemuva komhlangano wesigungu esiphezulu, kulandela ukuqinisekisa ukuvikeleka kwemali yabantu ebifa- kwe kuleli bhange, kanjalo nabamabhizinisi abebetshale imali yabo kulona.
Ngemuva kokungenelela kukahulumeni wesifundazwe, babalelwa ku-65 000 abantu abakwazile ukuthola imali yabo ebivaleleke kuleli bhange, elinganiselwa kuR1.7 billion. Ukungenelela kwesifundazwe kukwazile ukumisa ukuvalwa kwaleli bhange ngabakwaPrudential Authority.
UNtuli uthe lokhu kukhombisa ngokusobala ukuzibophezela kwalo hulumeni ukuqinisekisa ukuthi umnotho wesifundazwe uyasimama ngalo leli bhange. Uthe ukuqinisekisa ukuthatha izinyathelo ezinqala kulabo abathintekayo ukuguqisa leli bhange, luyaqhubeka uhlelo lophenyo lweSIU, ukuze kube khona ababhekana nengalo yomthetho.
UNtuli uthe labo abathintekayo ekuguqiseni leli bhange, kumele bathathelwe izinyathelo. Uthe ngalokhu ngeke bakhethe iphela emasini, njengoba befuna noma ngubani ngaphandle kokubheka izikhundla nezinga abakulona, kodwa uma ku- khona okuphambene nomthetho, abakutholayo, izinyathelo zizothathwa.
Uthe lokhu abakwenzi ngenxa yokulungisa umonakalo kuphela, kodwa bafuna nokuvuselela lolu hlaka lukahulumeni olumqoka, futhi olusengadlala indima emqoka ukuvuselela umnotho wesifundazwe.
