BAKUYINJABULO yodwa kubantu abakhele uMasipala iNkosi Mtubatuba, noMkhandlu waseMkhanyakude, ngoLwesine, ntambama, ngesikhathi kutheleka ithimba labatshali zimali elihlose ukwakha inxanxathela yezitolo eliingadla u R400 million.
Ithimba losomabhizinisi abazimele, lemukelwe yiMeya yaseNkosi Mtubatuba Local Municipality, uMnu Mxolisi Mthethwa, namakhansela, neNkosi uNtokozo Mkhwanazi. Akuyona yodwa inxanxathela yezitolo ezokwakhiwa eMtubatuba ,njengoba bethembise ukuletha nenthuthuko ka R2,1 billion.
“Ezinhlweni zokuthuthukisa indawo, bazosisiza siphucule ingqalasizinda, ikakhulukazi emalokishini KwaMsane, eRiver View, eNorthdale, eSt Lucia, naseDukuduku. Kuzokwakhiwa amahhotela, amapaki, kuphuculwe amarenki amatekisi, neBelllamont Solar Park,” kusho iMeya uMthethwa.
Intuthuko elethwa eMtubatuba, ayizukugcina ngokusiza abantu bakhona, kodwa kuzovuleka amathuba kubantu baseMkhanyakude wonke. Leya ngxenye yesifundazwe, ingenye yezihlwempu kakhulu njengoba abantu abayakhele beqashwe eziqiwini, emahotela, abanye bayizisebenzi zikahulumeni
Enye inxanxathela yezitolo ivulwe ngenyanga edlule, eMpangeni, yaqanjwa ngeNkosi uMangosuthu Buthelezi. UNdunakulu waKwaZulu-Natal, uMnu Thami Ntuli, ubenembizo, KwaMqobokazi, khona eMkhanyakude, ngenyanga edlule,lapho ezwe khona izikhalo zabantu abakhe khona nabahlala khona. Lokhu kubathintile osozimboni nosomabhizinisi, bafaka isandla ekuthuthukiseni isifunda.
menzi.jele@ilananews.co.za
