BAYIVULE kahle abasubathi imidlalo ye-Athletics South Africa (ASA) Senior Track & Field Championships eqale namuhla ngoLwesine ezosongwa ngoMgqibelo eNWU McArthur Stadium, eNorth West.
UGift Leotlela udle umhlanganiso kwi-100m eshiya imfivilithi uBayanda Walaza osefomini enhle kulezi zinsuku. UGift unqobe lomjaho ngesikhathi esiwu-9.99sec eshiya uWalaza oqophe u-10.00sec.
Lezi zikhathi ezenziwe yilaba basubathi zibanika ithikithi lokumela izwe emidlalweni yeWorld Athletics Championships ezokuba ngoSeptember eJapan njengoba isikhathi esibekwe yiWorld Athletics kuwu-10.00sec kwi-100m.
UWalaza ogijima esigabeni samajuniya ungomunye wabasubathi asebesenzile isikhathi njengoba evule unyaka ngo-9.99sec.
UGift uthe ujabule kakhulu ngokunqoba kwazise uhlale isikhathi eside engagijimi ngenxa yokulimala.
Sisekuwo lo mjaho, uGlenrose Xaba wenze njengoba bekulindekile enqoba i-5000m eqopha u-15:27 kanti ukuze aye eJapan, bekufanele aqophe u-14:52. Uthi uzokuyogijma phesheya kwezilwandle ukufeza iphupho lakhe lokuya eJapan.
IKwaZulu-Natal yenze kahle kakhulu kulo mqhudelwano njengoba abasubathi bayo abangaphezulu kuka-7 bedlulele kweyandulela amanqamu, abanye baya kweyamanqamu. Labo basubathi nguPrudence Sekgodiso (800m), nguTsepo Tshite (800m), nguSlindile Hlatshwayo (800m), nguZakithi Nene (400m), nguKwazi Mgobhozi (800m), nguGena Loftsrand (800m), ukubala nje abambalwa.
