IZOKUBE izinyaziswe ikilabhu yeBetway Premiership iDr BV Mthethwa Mayoral Tournament ehlelwe umasipala iMfolozi ezoqala mhla ka-14 isongwe mhla ka-16 ku-August.
Lo mqhudelwano ngowesibili nonyaka kanti inhloso yawo ukuvundulula ithalente etsheni yendawo ngokusho kwemeya yaseMfolozi Xolani Bhengu.
Umqhudelwano wanonyaka wethulwe ngokusemthethweni ngoLwesihlanu olwedlule eMfolozi. Ngesikhathi wethulwa kuvezwe ukuthi uTechnical Director weSekhukhune United uThemba Sithole uzokube eyingxenye yawo ukuzohlwaya ithalente.
USithole uthe ujabule ngalento eyenziwa umasipala ukunikezela intsha ithuba lokuba uzoveza amakhono ayo. Uthi uzosebenzisana nomasipala ukuqinisekisa ukuthi liyafezeka iphupho lawo.
Lo mqhudelwano uzodlalelwa eSiyabonga Sangweni Sports Complex okuyinkundla eqanjwe ngomunye wabadlali wakulendawo owazakhela igama egijima emakilabhini ahlukene kwiPremiership nakwiBafana Bafana.
UBV Mthethwa okuqanjwe ngaye le midlalo ungomunye wosopolitiki odumile KwaZulu-Natal. Uke waba yimeya yasoThungulu osekuyiKing Cetshwayo ehlanganisa iMfolozi, uMhlathuze, uMlalazi, iNkandla noMthonjaneni. UMthethwa kuthiwa wayezithanda ezemidlalo.
USihlalo wekomidi lezeMidlalo eMfolozi, uKhansela uNhlakanipho Conco, uveze ukuthi lemidlalo izoba yinkundla yokuhlonza amakhono entsheni yaseMfolozi. Uthi abadingeki abadlali abaphuma ngaphandle.
Izinhlaka ezibambe iqhaza kubalwa kuwo iStandard Bank, uMnyango wezeMidlalo, Inhlansiyethemba Community Development neSekhukhune United.
IMeya uBhengu ubonge iStandard Bank ngokuzibophezela ekuxhaseni le midlalo kanye nabo bonke ababambe iqhaza ekutheni ibe yimpumelelo. Uncome iqaza elabanjwa uDkt B.V. Mthethwa ekuthuthukiseni umphakathi ngezindlela ezahlukene.
Ngaphezu kwezemidlalo, lo mqhudelwano uzophinde uvulele amathuba abaculi abasafufusa bendawo ukuveza amakhono abo.
Kuzonikezwa ithuba lokuzibonakalisa komculi oyedwa ewadini ngalinye ukuze kube khona abakucoshayo. IMeya uBhengu ugcizelele ukubaluleka kokuthi bonke abazobamba iqhaza kule midlalo kube ngabaseMfolozi kuphela.
