BHEKI NDLOVANA
UHLELO lokubhaliswa kwamabhizinisi ahweba emalokishini nasemakhaya, okubalwa kuwona nama-spaza shop, kuthiwa kaluqondene nomasipala kuphela, kodwa lubandakanya neminyango kahulumeni.
UMnyango wezaseKhaya kubikwa ukuthi yiwona omqoka kakhulu kulolu hlelo ngoba yiwona ozokwazi ukuqinisekisa ukuthi umuntu obhalisayo nguyena ngempela yini, nokuthi ungumhlali waseNingizimu Afrika osemthethweni.
NgoLwesine esithangamini sabezindaba, uNgqongqoshe wezokuThuthukiswa kwamaBhizinisi amaNcane, uNkk Stella Ndabeni-Abrahams uthe abantu abanazo zonke izimfanelo ezidingekayo, bazozithola izimvume zokuhweba. Uqhube wathi abangenayo imininingwane edingekayo, bazochithwa.
Uthe akaqondi ukuthi kungani abanye abanezitolo sebekhononda ngokuthi zincane izinsuku eziwu-21 abanqunyelwe ukuba babhalise zingakapheli.
“Wusuku lwesine namhlanje kusukela uMengameli (uMnu Cyril Ramaphosa) ememezele izinsuku eziwu-21 (okufanele kubhaliswe ngazo), kodwa abantu sebecela ukwelulelwa isikhathi. Angazi noma yingoba bakholwa wukuthi kabanawo amaphepha afanele (ukuba babhaliswe). Uma unamaphepha asemthethweni, kakukho okukuvimbayo ukuba uhambe uyobhalisa,” kusho uNkk Ndabeni-Abrahams.
Uphinde wagcizelela ukuthi amabhizinisi azobhaliswa ngaphansi komasipala yilawo avele ebhalisiwe ngokusemthethweni ezinhlakeni ezifanele njengakwiCompanies and Intellectual Property Commission (CIPC). Uthe kakuwona kuphela ama-spaza shop ahweba kulezi zindawo okumele abhalise, kodwa wonke amabhizinisi okubandakanya kuwo nezindawo ezidayisa inyama (butchery), nama-wholesalers.
UMnu Velenkosini Hlabisa, onguNgqongqoshe wezokuBusa ngokuBambisana nezoMdabu, ugcizelele ukuthi abangenawo amaphepha okuba kuleli ngeke bazithole izimvume zokuhweba emiphakathini.
