BAKHALE ngaphansi eNkantolo eNkulu eMgungundlovu abebefake isicelo sokuvimba uhlelo lokuphakelwa kwezikole Kwa-Zulu-Natal ukuba luqhubeke, zingaxakazululwa izikhalazo zabo.
NgoLwesihlanu inkantolo ikhiphe isinqumo esivuna uMnyango wezeMfundo ukuba uqhubeke nohlelo njengoba kuzoqala izinkampani ezintsha ngoMbasa (April). I-National School Nutrition Programme Service Providers Association ibifake isicelo esiphuthumayo enkantolo, sokuvimba umnyango ukuba uqhubeke ngenxa yezinsolo zenkohlakalo ezibikwe ngesikhathi kuqokwa izinkampani ezintsha.
Phakathi kwezinsolo ezivelile, ngezokuthi kunezinkampani ezithole umsebenzi ekubeni zingenazo izimfanelo ebezifuneka, ezinye zazo amaphepha azo alungiswe seluvaliwe uhlelo lokuqokwa kwezinkampani, wukugxambukela kosopolitiki be-ANC, okubalwa noNgqongqoshe wezeMfundo uMnu Sipho Hlomuka, okuthiwa kwahlomula inkampani ebhaliswe ngomndeni wakhe.
Lezi zinkinga zibangele ukuba lumiswe uhlelo ngesikhathi kusacutshungulwa izikhalazo, okuthe ngokuhamba kwesikhathi, kwamenyezelwa imiphumela yophenyo obelwenziwa nguNdunankulu wesifundazwe uMnu Thami Ntuli, oluthe alutholanga gcobho.
Okhulumela usoseshini uMnu Linda Matiwane, uthe akusikhona ukuthi kabafuni kudle abafundi ezikoleni, kodwa abakhala ngakho wukuthi luqhubeka kanjani uhlelo ekubeni kusenezikhalazo ezingaxazululekile.
“UMnyango wezeMfundo uphusha amanga ukuze sibukeke njengabantu abangafuni kudle izingane. Iphuzu lethu, sikhala ngenkohlakalo, sifuna kuvele ukuthi esasikusho kungamanga yini, ngoba sibuphethe ubufakazi,” kusho uMatiwane.
UMmeli woMnyango wezeMfundo KwaZulu-Natal, u-Adv Griffith Madonsela, ekhuluma kweminye imithombo yabezindaba, uthe akufanele kulimale abafundi ekubeni kwezinye izifunda zingekho izimangalo ngalolu hlelo.
Kuvela ukuthi uMnyango wezeMfundo uzimisele ngokuthi ziqhubeke izinkampani ezintsha, ziphake kulezi zifunda okungafakwanga kuzona izikhalazo ngalolu hlelo. UHlomuka ukhiphe isitatimende ethi bayasemukela isinqumo senkantolo sokuthi luqhubeke uhlelo lokudla ezikoleni. Uthe lokhu kusho ukuthi umnyango ungaqhubeka ngaphandle kokuphazamiseka, ngesikhathi kusabhekwa okungakalungiseki mayelana nohlelo.
“Sizoqinisekisa ukuthi bonke abantwana bayakuthola ukudla esifundazweni, siyazibophezela kulokho, futhi akukho okuphazamisa uhlelo,” esho.
Uthi njengamanje kunezingxoxo eziqhubekayo ezakhayo nabo bonke ababambe iqhaza, ukuze kuqinisekiswe ukuthi uhlelo lusebenza ngendlela efanele. Uthe umnyango usuthathe izinyathelo zokuthuthukisa izindlela zokuqapha nezokwengamela, ukuthuthukisa ukusebenza kahle ekuthengeni nasekukhokheni imali kulabo abenza umsebenzi, nokuqinisekisa ukuthi abahlinzeki bokudla bahola ngesikhathi.
