IDemocratic Alliance (DA) isifake amaphepha enkantolo ukuvimba umthelisi (iSars) ukuqala ukusebenzisa ngokusemthethweni intela yokuthenga iVAT ewu-15.5%.
Lokhu kuza ngemuva kokuba iPhalamende izolo livotele ukuphasisa isabelomali sikaMnu Enoch Godongwana ongungqongqoshe wezeMali esiqubule umsindo ngemuva kokwethulwa kwaso. Kulesi sabelomali kuvele ukuthi iVAT izokwenyuswa ngo-0.5% iminyaka emibili.
Ukuvotelwa kwale bhajethi sekufake ungabazane ngekusasa likahulumeni wobumbano (iGNU), iDA eyingxenye yayo ngokubambisana ne-ANC, i-IFP, namanye amaqembu.
Namuhla ngoLwesine iDA inikele eNkantolo eNkulu yaseWestern Cape iyofaka isicelo sokuba kuthathwe njengokungekho emthethweni ukuphasiswa kwebhajethi. Ithi iphasiswe ngaphandle kokuhlolisiswa komthelela ezokuba nawo ezakhamizini zakuleli, iningi lazo elidla imbuya ngothi.
