BEKUNGAKABOSHWA muntu ngokutholakala kwesidakamizwa iCocaine senani elinganiselwa ku-R36 million (90kg) echwebeni laseThekwini izolo ngoMgqibelo. Ngokusho koKlebe, amaphoyisa alunywe indlebe ngalezi zidakamizwa okuthiwa bezifihlwe emishinini yokumba (excavator), efike ngomkhumbi ophuma eBrazil.
“Kuthe uma kuqaqwa umshini, kwatholakala izijumbana eziwu-47 zokuthile okusampushana, obekusolakala ukuthi yiCocaine, zifakwe eduze kwenjini. Kuthe kusasetshenzwa lowo mshini, izisebenzi zasechwebeni zabika ukuthi sezithole ezinye izijumbane komunye. Nakhona kuthe uma kuqaqwa, kwatholakala ezinye eziwu-47,” kusho isitatimende samaphoyisa.
Isitatimende siqhuba sithi kusaphenywa ngalesi sidakamizwa, kanti lezi zijumbana zizoyiswa eLabaratory ziyohlolwa.
Kwenzeka lokhu nje, amehlo athe njo kwiKhomishini yeJaji uMadlanga lapho kuphenywa izikhulu zamaphoyisa ngenkohlakalo, mayelana nokunyamalala kwezidakamizwa ezazishaqwe ngamaphoyisa kulona leli chweba ngo-2021.
Kuvele ukungahanjiswa ngendlela efanele kophenyo lwamaphoyisa kusukela lezi zidakamizwa (ezilinganiselwa ku-R200 million) zitholwa, ziyiswa eSiphingo, ngaphambi kokuyiswa ePortshepstone lapho okuthiwa zebiwa khona.
