Izithombe: nguNhlanhla Gumede
BUPHELILE ubumpohlo kuKininonke “Kini” Shandu, ongumlingisi womdlalo Umkhokha, ogcagcelwe ngokwesintu ngowakwakhe uNkk Andile Khanyile-Shandu, endaweni yaseNgqutshini, eGingindlovu, izolo ngeSonto.
Lo mshado oqhutshwe ngokwenkolo yobuNazaretha, njengoba lezi zithandani zikhonza kuleli bandla, ubuhanjelwe yizicukuthwane ezehlukene okubalwa kuzona osaziwayo, osopolitiki namalungu omphakathi.
Bekungakapheli sikhathi singakanani uKini, olingisa indawo kaNdlovu, elobole wakhehla lesi sinqandamathe sakhe asikhetha ebhentshini enkonzweni, ngaphambi kokuba bahlanganiswe ngokwenkolo eBuhleni, eNanda, ngaphansi kweNkosi uMduduzi “Nyazilwezulu” Shembe.
UKini ubuye abe ngusomabhizinisi nomethuli wezinhlelo njengoba eke wethula iDaily Thetha kuSABC1, wasebenza nasemzazweni iGagagasi FM.
Phakathi kosaziwawo abebehambele lo mcimbi, obekufinywa ngendololwane kuwona, kubalwa uXolani Mcineka weMpucuzeko Maskandi Festival, uZwakele Mncwango ongumholi we-Action SA KwaZulu-Natal, nabanye abaningi.
