LUCKY CAIN
IBHINCISELA imidlalo yodumo nganxanye imidlalo kamabonakude ekhonjiswa esiteshini iZee Zonke okuyisiteshi esikhombisa kakhulu imidlalo yamaNdiya okukhulunywa kuyona ulimi lwesiZulu.
Izibalo zakamuva eziphume ngoMandulo noMfumfu ezikhishwe ngabe Broadcast Research Council Of South Africa ibeka umdlalo Umakoti Oyintandokazi isibili emidlalweni yonke ekhonjiswa ngaphansi kweziteshi ezitholakala kwi-DStv ngaphandle kweze-SABC.
Lo mdlalo ulandela iSibongile And The Dlaminis oyiwona mdlalo oqenqelezayo kulezi zinsuku ngababukeli abafinyelela ku-1.3 million njengoba wona ulandela ngababalelwa ku-900 000.
Umdlalo Umakoti Oyintandokazi udlula imidlalo yodumo okubalwa kuyo Umkhokha, My Brothers Keeper, The River, Gqeberha neminye.
Ngaphandle kwemidlalo kamabokude uphinde ubhincisele nganxanye nezinye izinhlelo njengoba ezifana no-X Repo, Fake Gobela, Uthando Nes’thembu, Fake Pastors nayo ingaliboni elidlalayo.
Emiye imidlalo ekhonjiswa kwi-Zee Zonke eyenza kahle ngethi Ukube Ngangazi elele isihlanu nothi Umakhwapheni olele isikhombisa uma kuqhathaniswa nayo yonke imidlalo ekhona ngaphansi kweziteshi ze-DStv.
Okhulumela lesi siteshi esiqale ukukhonjiswa ngoNcwaba wonyaka owedlule uNks Linda Oliphant ucele ukuthunyelelwa imibuzo kodwa ubengakaphenduli.
