KULINDELEKE ukuba lithi ukunyakaza kancane ijoka emahlombe abathengi, njengoba ongoti beqagula ukuthi izokwehliswa intengo kaphethiloli ekuqaleni kwenyanga ezayo.
Ngokusho kweCentral Energy Fund, izibalo zikhomba ukuthi selokhu kuqale inyanga ephezulu, izindleko zemboni kaphethiloli bezilokhu ziya ngokuba ngcono, okuyinto engaba nomthelela ekwehlisweni kwentengo yemikhiqizo.
Uphethiloli kulindelwe ukuba wehle ngo-61 cents elitheni (93 Oct) no-57 cents (95 Oct), kuthi intengo kadizili yona yehle ngo-33 cents ilitha. Uphalafini wona kubhekwe ukuthi wehle ngo-13 cents ilitha.
Ukusimama kwerandi uma liqhathaniswa nedola laseMelika, kanjalo nozinzo entengweni kawoyela emhlabeni, kuthiwa nge-zinye zezizathu zokwehla kukaphethiloli. Kubhekwe ukuthi irandi liqhubeke nokudlondlobala kulandela isinqumo sangoLwesihlanu seFinancial Action Task Force, sokukhipha iNingizimu Afrika ohlwini olubizwa ngeGrey List, okungamazwe adinga ukuqashwa ngelokhozi ezintweni ezithinta inkohlakalo nokushushunjiswa kwemali.
Izolo ngeSonto idola laseMelika belilingana no-R17,26.
