UZOHLANGANA okokuqala namakhosi selokhu ekhishiwe esikhundleni sokuba ngundunankulu wesizwe samaZulu, uNgqongqoshe woMnyango wezokuBusa ngokuBambisana nezoMdabu, uMfu Thulasizwe Buthelezi.
Kuzokhumbuleka ukuthi kakukabi zinsuku ezingaki kusabalale imibiko yokuthi Isilo uMisuzulu kaZwelithini, sesimkhiphile uButhelezi esikhundleni sokuba nguNdunankulu wesizwe.
NgoLwesihlanu, uButhelezi uzohlangana namakhosi akulesi sifundazwe, lapho kulindeleke ukuthi ezinye zento okuzobe kukhulunywa ngazo, kube wukukhishwa kwakhe esikhundleni.
Ngikwesitatimende esikhishwe yilo mnyango, kulo mhlangano kuzokhulunywa ngokukwazi ukuzimela ngokomnotho kwamakhosi, ukhetho lomkhandlu wobukhosi bendabuko kanjalo neqhaza okumele libanjwe ngamakhosi ekuthuthukisweni kwemihlaba yawo.
Umhlangano lona kuthiwa uzobanjelwa eSishayanthetho esidala oLundi.
nonhlakaniphos@ilanganews.co.za
