ABASHAYELI baseNingizimu Afrika bazowuqala ngezindaba ezimnandi unyaka ka-2026 kulandela isimemezelo sokwehla kukaphethiloli nodizili.
Inhlangano ebhekelele ezamandla kuleli iCentral Energy Fund (CEF) yenza izinguquko entengweni kaphethiloli nyanga zonke, eziqala ukusebenza ngoLwesithathu lokuqala lwaleyo nyanga.
Ngokwezibalo zakamuva zeCEF kulindeleke ukuthi uphethiloli wehle ngokuphakathi kuka-46 cents no-54 cents elitheni. Ezimtoti kakhulu ngezentengo kadizili njengoba kubhekwe ukuba yehle ngokuphakathi kuka-R1.26 no-R1.38 elitheni. Kubhekwe ukuba ukwehla kwentengo kadizili nekaphethiloli kwenze ngcono intengo yezimpahla nezindleko zokuphila zonkana.
Ongoti bathi ukwehla kwentengo kawoyela ongahluziwe ezimakethe zomhlaba nokuqina kwerandi lakuleli uma liqhathaniswa nezimali zakwamanye amazwe yizona zinto ezibe nomthelela omkhulu kulokhu.
