“UMSEBENZI wethu ophuthumayo okumele siwenze, wukukhulisa umnotho ukuze sikwazi ukudala amathuba emisebenzi, sinciphise ububha futhi sithuthukise impilo yabo bonke abantu baseNingizimu Afrika”.
Lawa ngamazwi kaMengameli Cyril Ramaphosa, awasho enkulumweni yakhe yesizwe, iState of the Nation Address (SONA) ngoLwesine kusihlwa.
URamaphosa uthi ukuze kwenzeke lo msebenzi ophuthumayo wokukhuliswa komnotho, kudingena uhulumeni osebenzela abantu. Uthi kudingeka izwe elinamandla okwenza izinto ngendlela efanele, elesekelwe yizisebenzi zikahulumeni ezinobungcweti.
Uqhube wathi abantu baseNingizimu Afrika bafuna uhulumeni obaphatha ngesizotha, intobeko nenhlonipho. Futhi uthi abantu bafuna izwe elinabaholi abakulungele ukusebenza ngokuzinikela okuphelele; kanye nezisebenzi zikahulumeni ezinesimilo, amakhono, futhi eziqeqesheke ngendlela efanele.
URamaphosa uthembise ukuthi ukuze bakwazi ukufeza lezi zinhloso zokwakha uhulumeni osebenzela abantu ngendlela efanele, futhi onezisebenzi zomphakathi ezisebenza ngokuzinikela nangobuqotho, bazoqinisa umsebenzi weKhomishana yezemiSebenzi kaHulumeni (Public Service Commission) wokuqokwa kwabantu abafakwa ezikhundleni eziphezulu kuhulumeni njengabaqondisi jikelele; amasekela abaqondisi jikelele; yizikhulu eziphezulu ezinkampaneni zikahulumeni; amalungu amabhodi, kanye nezinye izisebenzi ezisezikhundleni eziphezulu.
Uthi kuzokwethula nohlelo lokuqashwa kwabantu abaneziqu ukuze uhulumeni uhlome ngezisebenzi ezichithile futhi ezinobungcweti.
