LUCKY CAIN
UCHAZWE yi-ANC KwaZulu-Natal njengomuntu okhonze uqhekeko – ongalukhuthazi ubumbano – uNgqongqoshe wezokuBusa ngokuBambisana nezoMdabu kulesi sifundazwe, uMfu Thulasizwe Buthelezi. Lokhu kushiwo ngusihlalo waleli qembu kulesi sifundazwe, uMnu Siboniso Duma ngesikhathi ephawula ngezinsuku eziwu-100 i-ANC iyingxenye kahulumeni wobumbano. Uthe nakuba besebenzisana kahle ne-IFP, iDA neNFP kodwa kunabaholi abathile abakhethe ukuphuma eceleni.
UBUHOLI be-ANC KwaZulu-Natal.
Uzwakalise ukukhathazeka kwe-ANC esifundazweni ngesenzo sikaMfu Buthelezi, ikakhulukazi sokuxosha nokumisa izinduna. Uthembise ukuthi bazoxoxa nobuholi be-IFP ngodaba oluthinta lo mholi. Uthe bayakujabulela ukusebenza kulo hulumeni futhi bazohlala kuwona kuze kuphele iminyaka ewu-5.
Unobhala waleli qembu, uMnu Bheki Mtolo, uveze ukuthi okunye okubamangazile ngoMfu Buthelezi wudaba lwesithombe sakhe emalolini amanzi. Uthe lokhu kukhombisa ngokusobala ukuthi lo mnyango usewuphendule wawenza waba ngaye. Isekela-sihlalo le-ANC kulesi sifundazwe, uNkk Nomagugu Simelane, lithe selokhu uMfu Buthelezi wathatha izintambo kulo mnyango uhlale ehlasela bonke omasipala abaholwa yi-ANC.
