I-ANC ithi izimisele ukuxoxisana ngisho namaqembu angeyona ingxenye kaHulumeni woBumbano iGNU, ngenhloso yokuthola izibalo zamavoti ukuze kuphasiswe isabelomali.
Izolo ngoLwesithathu uNgqongqoshe wezeMali uMnu Enoch Godongwana wethule inkulumo yesabelomali ePhalamande, eKapa, lapho eveze khona ukuthi intela yokuthenga iVAT izonyuswa ngo-0,5 percentage points iminyaka emibili ilandelana.
Indaba yeVAT iyizambane elishisayo njengoba amaqembu, okubalwa kuwona neDA eyingxenye yeGNU, eveze ukuthi azokuphikisa ukuphasiswa kwalesi sabelomali uma sekuvotwa ePhalamende.
Ekhuluma nabezindaba ngoLwesine, ekomkhulu le-ANC, eLuthuli House, eGoli, uMnu Fikile Mbalula, onguNobhala-Jikelele wale nhlangano, uthe baxoxisana nawo wonke amaqembu – ngisho nalawa angeyona ingxenye yeGNU.
“Ibhajethi izophasiswa ngokubambisana nawo wonke umuntu oyingxenye kahulumeni futhi i-ANC ikulungele ukuxoxisana nawo wonke amaqembu epolitiki. Sihlale sivule izandla ukuxoxisana nanoma ngubani, kodwa lokho akusho kuthi sizovuma noma yini,” kusho uMbalula.
