SIKHUZE ukuchitheka kwegazi embonini yamatekisi iSilo uMisuzulu kaZwelithini. IMbube beyethula inkulumo yosuku emcimbini woMkhosi woMhlanga obubanjelwe esigodlweni eMachobeni, eNgwavuma, ngaphansi kukaMasipala iJozini, eMkhanyakude.
Lo mkhosi uyaye ubanjelwe kulesi sigodlo minyaka yonke. Wandulela omkhulu obekwaziwa ukuthi ubanjelwa esigodlweni eNyokeni, KwaNongoma. Kulo nyaka ngeke ubanjelwe eNyokeni kulandela isimemezelo seSilo sokuthi sesiwuthuthela esigodlweni saso eMashobeni, oPhongolo.
INdlulamithi iveze ukuthi lokhu ikwenza ngezizathu zesiko lamaZulu eligunyaza iSilo esisesihlalweni ukuba sibe nesigodlo saso, okuzogujelwa kusona yonke imikhosi okubalwa kuyona uMkhosi Wokweshwama, oweSivivane nowoMhlanga.
Sethula inkulumo yaso iSilo, siqale ngokubonga izihambeli zalo mcimbi ezivela emazikweni ahlukene okubalwa nongqongqoshe beminyango kahulumeni. Ngalolu suku, izintombi-nto zisuke ziyokwethula umhlanga phambi kweNgonyama yesizwe okuwuphawu lokuqinisekisa ukuthi zisazigcinile izibaya zoyise. ISilo sikhuze udlame nokuchitheka kwegazi ematekisini.
“Inhlangano yezokuthutha iSantaco ihamba nomengameli wayo bazozethula lapha. Niqale kahle ngokwenza njalo. Kuyangikhathaza ukuthi uma kunokungaboni ngaso linye kube nababona ukuthi kufanele kuthathwe imiphefumulo yabanye.
“Akulungile lokho ngoba kugcina sekuthinteka nabantu bami. Ubaba ongizalayo wabuza ukuthi laba bantu okuthiwa ngama-taxi owner bangabantu yini noma bayizilwane. Uma beyizilwane, kufanele sibaphathise okwezilwane. Uma wenza izinto njengomuntu sizokuphatha njengomuntu. Ayiphele le nto yodlame ematekisini ngoba kayilungile,” kusho iMbube.
ISilo siphawule nangezinsolo zokuhlaselwa kwesiko lamaZulu.
“Maqondana nezimbali zezwe, ngiyaninxusa ukuba ningavumeli abafana badlale ngazo. Nonke lapha niyizingane zami. Angiyiboni nje intombi engingayikhetha ngoba omama benu bali-ngana nami. Ngiyanxusa ukuba ni-ziphathe kahle, uma kukhona ocela inombolo yocingo kanti uzokhuluma okuphambene, umtshele ukuthi makaxhumane neNgonyama. Mina-ke ngizobhekana naye ngoba angifuni kudlalwe ngezingane zami,” kubeka iSilo.
INkosi uSifisosamandelu Shinga, enguSihlalo weNdlu yabaHoli boMdabu KwaZulu-Natal, ibonge ukubambisana kwezinhlaka ezahlukene ukuze kuqinisekiswe ukuthi imicimbi yasendlunkulu iyaphumelela.
“Kubalulekile ukuthi sibambisane kuzona zonke izinhlelo ezithinta indlunkulu ngoba iwumgogodla wamasiko ethu. Amasiko awuphawu olusigqamisayo naphakathi kwezinye izizwe,” kusho uShinga.
