INGONYAMA yesizwe samaSwazi uMakhosetive ‘Mswati III’ Dlamini (57) idlulise amazwi enduduzo emndenini wamaKhatholika ngemuva kokugutshezelwa yifu elimnyama lokudlula emhlabeni komholi walo.
UPope Francis ubizelwe enkosini ngoMsombuluko, ngemuva kokusongwa komgubho wePhasika. Umufi waziwa kakhulu ngamagalelo akhe emkhakheni wokugqugquzela ubunye nokuhlonishwa kwenkolo yobuKhrestu.
INgonyama uMswati III iyaziwa ukuthi ingomunye wabaholi abebenobudlelwano obuhle nomufi. Ngonyaka odlule kusabalale izithombe zabo laba baholi nondlunkulu kaMswati, uNkk Nomcebo Zuma-Dlamini, oyindodakazi kaMnu Jacob Zuma owayengumengameli wakuleli futhi ongumholi weMK Party.
Kukuwo lo mhlangano lapho khona kwaqala ukubonakala uNkk Zuma-Dlamini efake indandatho yekhethelo efakwa ngakwesokunene. Ngokusho kwababekhona kulowo mhlangano, bathi kwaqalwa ngokuthwetshulwa kwezithombe, ngemuva kwalokho laba baholi bavalelana isikhathi eside.
Akekho onolwazi ukuthi babebhunga ngaziphi izindaba. Lokhu kwenzeke ngenkathi iNgonyama uMswati III yasikade inohambo lokuvakashela amazwe ahlukene. INgonyama idlulise amazwi enduduzo ngephimbo likandunankulu wezwe laseSwazini, uMnu Russell Dlamini.
