I-ANC ihlela ukuvulela ilungu le-DA ePhalamende uMnu Mark Burke nenkampani emataniswa nayo iKastelo icala ngemuva kokusabalala kwezinsolo ezithinta izigidigidi zamarandi.
USotswebhu we-ANC ePhalamende uMnu Mdumiseni Ntuli kubikwa ukuthi uthe inhloso yokuvula leli cala kulandela izinsolo eziphenywa iSouth African Reserve Bank ezithinta isamba semali elinganiselwa kuR4 billion.
UBurke okwikomidi lezezimali ePhalamende useshenxile emsebenzini wakhe kulandela ukuqhubeka kwalolu phenyo lweReserve Bank.
I-DA iveze ukuthi ukushenxa kukaBurke emsebenzini wakhe kuqinisekisa ukugwema kwakhe ukuphazamisa ukusebenza kwaleli komidi.
Esitatimendeni esikhishwe iDA siveze ukuthi kulandela ukusabalala kwalezi zinsolo sebethathe isinqumo sokwenza izinguquko kungene uMnu Kingsleu Wakelin esikhundleni sakhe kuleli komidi.
I-ANC ithe ukuvula kwayo leli cala wukuqinisekisa ukuthi lezi zinsolo zithola ukufakelwa izibuko ezifanele ukuze umthetho uthathe indawo yawo kanjalo neqiniso lihlale obala.
Iqhube ngokuthi ukushenxa kukaBurke esikhundleni akwanele ingakho ithathe isinqumo sokuvula leli cala.
UNtuli uvule leli calal eCape Town Police Station namhlanje ngoLwesihlanu.
