I-ANC KwaZulu Natal ihalalisele ubuholi obusha be-ANC Youth League esifundazweni obuqokwe engqungqutheleni yeshumi yalolu phiko ebingempelasonto.
Isitatimende saleli qembu siveze ukuthi le ngqungquthela ibe namandla futhi yahamba kahle kakhulu njengoba ikhumbise ubumbano nokuziphatha kahle kwamalungu alolu phiko.
Sichaze lolu phiko lwabantu abasha kuleli qembu njengelidlala indima emqoka ukuqinisekisa iphimbo labantu abasha ezingqinambeni ababhekene nazo ikakhulukazi ekulweni nokubakhulula kwezomnotho.
Kule ngqungquthela kuqokwe uMnu Ntokozo Ngcobo njengoSihlalo, uNkz Phindile Mdanda njengePhini likaSihlalo, uNkz Lulama Mabude njengoNobhala, uMnu Siyabonga Mzenda njengePhini likaNobhala noMnu Siphelele Masuku njengoMgcinimafa.
UNobhala we-ANC KwaZulu Natal uMnu Bheki Mtolo uthe banxusa lolu phiko ukuba lungapholisi maseko ukubeka izimfuno zabantu abasha phambili.
Uthe ihlandla labo malibe ngelezinto eziphathekayo ezizokwazi ukunikeza abantu abasha umkhombandlela. Uthe njenge-ANC esifundazweni bazibophezele ukubeseka lobu buholi.
