LUCKY CAIN
UNGQONGQOSHE wezoHulumeni baseKhaya nezoMdabu KwaZulu-Natal, uMfu Thulasizwe Buthelezi (osesithombeni), uthi i-ANC KwaZulu-Natal kumele ikwamukele ukuthi kayisekho emandleni kuhulumeni walesi sifundazwe, futhi afisa kucace wukuthi yena akabiki kuyona, usebenza kulesi sikhundla ngokujutshwa ngundunankulu wesifundwazwe, uMnu Thami Ntuli.
Ubephawula emuva kwezinsolo ezenziwe yi-ANC esigcawini sabezindaba namhlanje ngoMsombuluko, ebesimayelana nokuqeda kwayo izinsuku eziwu-100 iyingxenye kahulumeni wobambiswano. Abaqembu abambisene kulo hulumeni yi-IFP, i-ANC, iDA ne-NFP.
USihlalo we-ANC KwaZulu-Natal, uMnu Siboniso Duma nonobhala wayo, uMnu Bheki Mtolo, bachaze uMfu Buthelezi njengezambane elibolile kulo hulumeni, umuntu okhonze ukudala uqhekeko.
Eziphendulela uMfu Buthelezi, uthe usezizwile izinto ezishiwo yilaba baholi ngaye. Uthe afisa ukukucacisa wukuthi usebenza kulesi sikhundla ngokujutshwa nguNtuli, wathi uyazi ngemizamo ye-ANC kulesi sifundazwe yokubukela phansi ukusezebenza kwakhe njengongqongqoshe nangokuba ngundunankulu kaZulu. Uthe ngeke akuvumele ukuqinelwa yileli qembu.
