INYANGA kaMasingana (January) imatasa kakhulu kubafundi abaphothule umatikuletsheni njengoba iningi labo lizama izikhala zokufunda ezikhungweni zemfundo ephakeme.
Izinswelaboya ziyaye zisebenzise lesi sikhathi ukuqola abafundi ngokubayengela ekubhaliseni ezikhungweni ezingabhalisiwe ngaphansi koMnyango weMfundo ePhakeme, bakhokhiswe imali enkulu.
Lokhu kakugcini ngezikhungo zemfundo ephakeme, kwenzeka nasezikoleni ezingoqhibukhowe, ezithi zilekelela abafundi ngokulungisa imiphumela kamatikuletsheni.
Lo mbiko ulekelela abafundi ukuba bangazitholi beyizisulu zalokhu kuqolwa.
ABAFUNA IZIKHALA EZIKHUNGWENI ZEMFUNDO EPHAKEME
Ngasekupheleni kwesonto eledlule amanyuvesi aKwaZulu-Natal – okuyi-University of KwaZuluNatal (UKZN), yiDurban University of Technology (DUT), yiMangosuthu University of Technology (MUT) ne-University of Zululand (Unizulu), akhiphe uhlu lwezikhala ezikhona ukwamukela abafundi abazokwenza unyaka wokuqala, nenani lezicelo azitholile.
Izikhala ezikulezi zikhungo sezihlangene, zilinganiselwa ku-20 000, kanti izicelo ezifakwe ngabafundi zingaphezulu kuka-500 000, okuchaza ukuthi abanye babafundi bazozama inhlanhla bathole “nezimemo” zokuyofunda ezivela emakolishi azimele, okuyilapho kutholakala khona oqhibukhowe bezikhungo.
Abafundi abafisa ukufunda kulawa makolishi, bayexwayiswa ukuthi ngaphambi kokwamukela lezi zimemo, mabavakashele i-website yoMnyango weMfundo ePhakeme (www.dhet.gov. za).
Ngaphansi kwesihloko ethi Registers kunedokodo lamakolishi azimele abhaliswe emnyangweni.
Leli dokodo eligcine ukubuyekezwa nokuqinisekiswa wumnyango ngomhla ka-2 kwephezulu.
Ukugcizelela nje, sibalulekile isineke uma ubuka lolu luhlu lwamakolishi njengoba idokodo lingamakhasi awu-179 namakolishi awu-140, ahambisana nezifundo azihlinzekayo. Abafuna izikhala bangaphinde bafonele inombolo yamahhala yomnyango ethi: 0800-872-222, baqinisekise kuwo.
IZIKOLE EZINGOQHIBUKHOWE ZOKULUNGISA U-MATRIC
Ngeledlule ILANGA likhulume noMnu Elijah Mhlanga, okhulumela uMnyango wezeMfundo eyiSisekelo, olichazele kabanzi ngohlelo lomnyango, iSecond Chance Matric Programme (SCMP), olusiza abafundi ngokubhala kabusha izifundo abangenzanga kahle kuzo kumatikuletsheni.
Lolu wuhlelo oluphephile futhi olungenabo ubugebengu uma luqhathaniswa nezikole ezizimele ezenza okufanayo.
UMhlanga utshele ILANGA ukuthi ukubhalisa kulolu hlelo kuzovalwa ngomhla ka-14 wenyanga ezayo. Uthi abafundi abafisa ukubhalisa kulolu hlelo, bangavakashela emahhovisi emfundo ezifunda (District Offices).
Uthe kulaba abafuna ukufunda ezikoleni ezizimele, kumele baqinisekise ukuthi bafuna inombolo yaleso sikole ekhishwa wumnyango kuphela, bayiqinisekise emnyangweni noma ohlakeni olubhekelele ukukhishwa kwezitifiketi zikamatikuletsheni, uMalusi.
Nakuba isikhathi sesihambile, kodwa uMnyango weMfundo ePhakeme unxenxa abafundi abazobhalisela ukufunda ezikhungweni zemfundo ephakeme ukuba bangakubalekeli ukubhalisa emakolishi amakhono, amaTechnical and Vocational Education and Training (Tvet).
Ugcizelela ukuthi maningi amathuba avulwa yila makolishi, njengoba abafundi bephuma nolwazi olubhalwe encwadini nesipiliyoni njengoba kuyimpoqo ukuthi uhhafu weminyaka yabo yokufunda, bawuchithele ezindaweni zokusebenza.
Uthi abafundi abafunde kulezi zikhungo baba semathubeni amahle okuzisebenza ngesikhathi besalinde ithuba lemisebenzi abasuke beyifundele.
