UMA sifuna kulunge izinto, kumele sikhulume amaqiniso, uma sikhuluma amanga, ngeke kulunge esizama ukukulungisa. Asivume ukuthi kohulumeni basekhaya kuningi okudinga ukulungiswa, okuningi kwakho kuyaziwa.
Sekuphele iminyaka eminingi, kuzanywa ukulungisa lo mkhakha kahulumeni kodwa kunhlanga zimuka nomoya. Imibiko yomcwaningi mabhuku iveza izimo ezibucayi kakhulu. Empeleni omasipala bethu balele egunjini labagula kakhulu, se-kubonwa ngokusa. Umehluko wukuthi omasipala bethu bafana nesiguli esaziyo ukuthi siphethwe yini, kodwa asifuni ukudla imishanguzo yokwelapha isifo.
Into embi ngokugula komasipala bethu, wukuthi kuphinde kugulise izinsiza okumele ziye kubantu, futhi kubuyisela emuva intuthuko yemiphakathi. Isihlava esikhulu esibulala omasipala bethu ngabantu abanikezwe amagunya okuthuthukisa lab’ omasipala.
Into yokuqala okufanele siyivume, wukuthi sifaka abantu abangakulungele ukusebenza komasipala. Lokhu kwenzeka ezigabeni ezimbili. Ezingeni losopolitiki, yilapho kubhajwe khona kakhulu. Amakhansela ethu amaningi awazi nokuthi lidumephi. Akukho sicucu esigunyaza umuntu ukuba yikhansela, noma yimuphi umuntu othunyelwe yiqembu uyangena abe yikhansela.
Lomuntu kumele agunyazwe ukuba yikhansela ngokulawula kweMunicipal Structures Act, 1998 (Act 117 of 1998), ihambisana neMunicipal Electoral Act, 2000 (Act 27 of 2000), elawula ukuphakanyiswa komuntu okufanele abe yikhansela.
Lo mthetho awuchazi kahle ukuthi kumele ikhansela libe nani ngokwemfundo. Lokhu kubalulekile ngoba izinto ezicutshungulwa komasipala, zincike kakhulu emfundweni. Umphakathi ungamthanda umu-ntu ngoba ekhuthele endaweni yawo. Uma usuyikhansela emkhandlwini akusebenzi ukukhuthala kuphela, kodwa kumele kuhambisane nemfundo. Uma imfundo ingekho ukukhuthala kungafiphala kakhulu, ekugcineni kubonakale sengathi ikhansela liyehluleka, kanti cha akunjalo.
Baningi abantu abakhuthele emiphakathini, kodwa lokhu akusho ukuthi sekumele basebenzele umphakathi njengamakhansela. Bangasiza kwezinye izindawo ezingadingi imfundo noma iziqu. Kuyiqiniso futhi ukuthi kukhona abantu abafundile abaneziqu, kodwa umsebenzi uyabehlula ngoba abanalo uthando lokusebenzela umphakathi. Abanye bangena ebukhanseleni noma ekusebenzeleni umphakathi ngezinhloso ezingezinhle. Basebenzela imindeni nezihlobo zabo, bese konakala emphakathini.
Imithetho yomasipala kumele ihlengahlengiswe ngendlela ezokwenza kubelukhuni ukungena komuntu onezinhloso ezimbi. Kumele sazi ukuthi uma singenza omasipala bethu basebenze ngendlela, umsebenzi wokuletha izinsiza nezidingo zemiphakathi ungathela izithelo ezinhle.
Ukuhamba ngonyawo lonwabu kwezinto ngenxa yokwanelisa imithetho, nakho kungenye yezinto ezibambezela intuthuko nasekuletheni izidingo. Abantu baze bafe kusalandelwa imithetho, sengathi le mithetho ibalulekile kunempilo yabantu. Imithetho yethu eminingi ithathelwe emazweni athuthukile, ayizwelani nezimo akuzona amazwe asathuthuka njengaleli lakithi. Kumele esikuthekelayo kukwazi ukusebenza ezimeni zethu.
Akumele kudale usizi nokuhlu-pheka emazweni ethu. Yingakho-ke kumele izifundiswa zethu zilekelele ekwenzeni lemithetho ithuthu-kise ngendlela amazwe ethu, kunokuba ibe yizithiyo entuthukweni yethu. Omunye uzothi kukhona omasipala abathola imibiko engenagcobho. Noma ngabe imibiko mihle, ayinagcobho, inhlupheko yabantu bakhona yenza kube nogcobho. Kusizani ukuba kuhle kwamabhuku, kodwa intuthuko yabantu ingabi yinhle?
Omasipala abakhelwanga ubu-hle bamabhuku, kodwa bakhelwe ukuyisa intuthuko kubantu. Ubuhle bamabhuku kwenzelwe ubuqotho ekuphatheni imali yemiphakathi, hhayi ukuvimba intuthuko. Kwesinye isikhathi imali ize iphindise-lwe emuva ngoba kusatshwa imithetho. Makulungiswe okonakele kohulumeni basemakhaya, yibona abawumgogodla wentuthuko.
UMnumzane: Callistus Bheki Nkwanyana uneziqu zeMasters in Governance and Political Transformation. Wayengumqondisi: KZN office of the Premier: Community Partnership and Moral Regeneration. Ungumbhali wencwadi ethi: “Talking to Yourself: The Journey to Self-discovery”. Utholakala ku: nkwanyanacb60@gmail.com. Uyatholakala nangocingo neWhatsApp ku: 066 544 5466
