I-DA iyaqhubeka nokufaka ingcindezi kuNgqongqoshe wezobuCiko, amaSiko nezemiDlalo uMnu Gayton McKenzie (osesithombeni), mayelana nohambo lwakhe lokuyobuka imidlalo yeNdebe yoMhlaba yeFifa phesheya kwezilwandle, ezinyangeni ezimbalwa ezedlule.
Leli qembu selifake isicelo ngaphansi komthetho wokuthola ulwazi, iPromotion of Access to Information Act (PAIA), kuMengameli Cyril Ramaphosa, sokuthola yonke iminingwane yokuxhumana phakathi kukangqongqoshe nomengameli ngalolu hambo oluthathe inyanga yonke, lokuyobuka le midlalo.
Ngokusho kweDA, ungqongqoshe kumele athole imvume kumengameli uma ezothatha uhambo oluya phesheya kwezilwandle. Ngokwencwadi elawula ukusebenza kongqongqoshe, ungqongqo- she kumele angahambi nezisebenzi zehhovisi lakhe ezingaphezulu kwezimbili. Ilungu leDA ePhalamende elengamele ezemidlalo, uNkk Leah Potgieter, lithe ususe ukukhathazeka umbiko woMnyango wezobuCiko namaSiko nezemiDlalo, ngokusetshenziswa kwemali yabakhokhi bentela ngohambo lokuyobuka le midlalo.
“Umbuzo uthi, kungani ungqongqoshe avunyelwa ukuthatha abantu abaningi kangaka (ababalelwa ku-18) abaqhamuka ehhovisi lakhe? Isikhathi eside kanje. Kungabe umengameli wakuvumela kanjani lokhu?” kubuza uNkk Potgieter.
Uveze ukuthi emhlanganweni wangoLwesibili olwedlule, umnyango wehlulekile ukucacisa ngesibalo sezisebenzi zehhovisi likangqongqoshe ezaziyingxenye yalolu hambo. Uthe ukuvunyelwa kwalezi zisebenzi ukuthi zibe yingxenye yalolu hambo, kudinga ukuthi kuphenyisiswe.
Kuzokhumbuleka ukuthi umnyango waveza ukuthi wasebenzisa imali elinganiselwa ku-R31 million ngalolu hambo lokuyobuka le midlalo ebingo- Nhlangulana noNtulikazi (June noJuly). UMcKenzie wathi akukho okuphambene nomthetho ngokusetshenziswa kwemali ngalolu hambo. Waveza ukuthi yonke imali yasetshenziswa ngokusemthethweni, futhi ngendlela ehambisana nomthethosisekelo, olawula ukusetshenziswa kwemali yabakhokhi bentela.
lucky.cain@tzondiilanganews.co.za
