IVEZE usizi olunzima ebikade ibhekene nalo imindeni yaKwaNongoma eHlalankosi ehlomule ngemizi namhlanje ngoLwesihlanu emuva kokuhlala isikhathi eside ’emafukwini’ ngenxa yokukhahlanyezwa izikhukhula.
Kuhlomule imindeni ewu-10 ngemizi iyakhelwa uMnyango wezokuBusa ngokuBambisana neziNdaba zoMdabu kwaZulu-Natal ngaphansi kohlaka lokubhekelelwa kwezinhlekelele.
UNkk Cynthia Mncwango wasendaweni yakoBhayela, uthe indlu ebekade ehlala kuyona nomyeni wakhe ibingekho esimweni esihle.
Uthi izingane zabafana namantombazane bezihlangana ndawonye endlini eyodwa, uma kufanele kugeze abanye bayadedelana.
“Umuzi wami walimala waphela. Zonke izindlu eziwu-7 zabhidlika, kwasala eyodwa. Namhlanje siphumile osizini. Sibonga kakhulu ungqongqoshe walo mnyango ngokungenelela kwakhe,” kusho uNkk Mncwango.
Ngakolunye uhlangothi uNgqongqoshe uMfu Thulasizwe Buthelezi uthe izinhlekelele zenzeke nyakenye kuMbasa(April). Uthi lemndeni ibixakekile kakhulu.
“Sasithembisile ukuthi abantu siyobakhela izindlu ezinesithunzi. Kulezi zakhiwo, sakhe nendlu yakagogo urawondi. Inhloso yethu enkulu ngukuthi abantu bakithi abamnyama sibakhiphe osizini’ kusho uMfu Buthelezi.
Ngenyanga edlule, ungqongqoshe uMfu Buthelezi wakhele imindeni emine yaseMbumbulu eThekwini.
