LISENKINGENI ikhansela le-EFF kuMasipala waseMadlangeni (Utrecht), eMajuba, elikhethwe laba yiphini lemeya, njengoba iqembu lalo lithi malidilike kulesi sikhundla.
UMnu Mbongeni Khumalo ukhethelwe kulesi sikhundla ngenyanga edlule, kulo masipala ophethwe yi-IFP. I-EFF ithi kayimgunyazanga ukwamukela lesi sikhundla, yinto azihlelele yona ngasese namakhansela e-IFP.
UMnu Themba Msibi we-EFF, uthi bathole ezinkundleni zokuxhumana ukuthi uKhumalo useyiphini lemeya eMadlangeni.
“Wephule imigomo yeqembu. Akekho umuntu owenza ngendlela yakhe lapha kwi-EFF. Iqembu kaliyona ingxenye yale nto uKhumalo ayenzile. Sesimbhalele incwadi, samyalela ukuba esule kulesi sikhundla, kodwa akafuni, usaqhubeka uhleli ehhovisi elabelwe iphini lemeya.
“Udaba lwakhe selwedluliselwe ekomkhulu le-EFF, okungagcina esethathelwe izinyathelo zokuqondiswa ubugwegwe,’ kusho uMsibi.
Kakuqali ngoKhumalo kwi-EFF ukuthi ikhansela lizithole selimonyulwa esikhundleni KwaZulu-Natal. Amakhansela aleli qembu kuMasipala waseMhlathuze, akhishwa ngesidlozana wubuholi, emuva kokwenqaba ukwesula ezikhundleni.
Kulobu buholi kwakukhona noSihlalo we-EFF esifundazweni, uMnu Mongezi Thwala.
Baqhinqa emahhovisi aseMlathuze ngoNdasa (March), bethi bafuna amakhansela e-IFP – okuyiyona elawula umasipala – axoshe ozakwabo be-EFF. Nawo la makhansela ayesolwa ngokungawulaleli umyalelo
wobuholi.
