UXWAYISE abezimboni namafemu ngobungozi bokuqasha abokufika abakuleli ngokungemthetho uNdunakulu waKwaZulu-Natal uMnu Thami Ntuli.
UNtuli ubekhuluma nabemithombo yezindaba namuhla eCornobia eThekwini. Uthe akufanele kube nokwenzelela uma kukhulunywa udaba lwabantu bokufika kuleli.
“Ngikhuluma obala ngokucacile ukuthi abantu abalapha KwaZulu-Natal makube ngabantu abahlala khona ngokusemthethweni. Uma kukhona olapha ngokungemthetho, kuwubugebengu lokho. Akufanele abantu bangene lapha ngokungemthetho, bazoganga.
“Abanye abgila imikhuba, bathengisa izidakamizwa, bayantshontsha, kuningi. Ngithi mababuyele emazweni abo bayofuna izimvume ngoba umthetho uyabavumela ukwenza lokho. Nezisebenzi zeminyango kahulumeni siyazexwayisa.
“Angikungabazi ukuthi ngokwesibalo samafemu nezimboni esinazo lapha esifundazweni, baningi abantu abangasebenza. Ngithanda nokuxwayisa abaqashi abaqhubeka nomkhuba wokuqasha abantu bokufika kuleli. Ngithi nje, kukhona okusina kubajeqeza,” kusho uNtuli.
