I-EFF ifuna ibhantshi ligcwale umoya kuNgqongqoshe wezeMali uMnu Enoch Godongwana noMqondisi-Jikelele eHhovisi likaMgcinimafa uMnu Duncan Pieterse kulandela ukuhoxiswa kwesinqumo sokwenyusa intela yokuthenga iVAT ngo-0.5%.
I-VAT ibizokwenyuka isuka ku-15% iye ku-15.5% kusukela ngomhla ka-1 kuNhlaba (May), kanti kuthiwa ukwenyuswa kwayo kuhoxisiwe ngemuva kokuxoxisana kwamaqembu ayingxenye yePhalamende.
“Le nsambatheka ethinta ibhajethi ikhombisa ngokusobala ukuthi ungqongqoshe nomqondisi-jikelele ziyabaxega izicathulo abazigqokile. Lokhu kubeka engcupheni uzinzo lwezomnotho ezweni, nempilo yezakhamizi zaseNingizimu Afrika,” kusho uMnu Sinawo Thambo okhulumela i-EFF.
Uthe iqembu lakhe liyakwemukela ukwenyuswa kweVAT, futhi lifuna ichithwe imigomo yokusebenza kwemali (fiscal framework) ephasiswe yiPhalamende emasontweni edlule.
Ukwenyuswa kweVAT bekuphikiswa ngamaqembu ahlukene epolitiki njengoba iDA ne-EFF benikele enkantolo, kwathi amanye amaqembu okubalwa kuwona i-Action SA, iBuild One SA ne-IFP axoxisana ne-ANC ukuthola ezinye izindlela zokuqoqa imali edingekayo ngaphandle kokwandisa umthwalo emahlombe abathengi.
