BAFUNGE bagomela bathi bazolwa kuze kunqamuke izandla bephikisana nokuvalwa kwebhange Ithala okuhlongozwayo abaholi be-IFP namalungu ayo kusukela emazingeni aphansi kuyofinyelela kuzwelonke.
Leli qembu libambe enkulu imashi liyibhekise eReserve Bank enkabeni yedolobha iTheku namuhla ngoMsombuluko.
Phakathi kwabaholi bayo bekukhona umongameli walo uMnu Velenkosini Hlabisa nokunguyena owethule uhlu lwezikhalo zaleli qembu. Usihlalo walo eKZN uMnu Thami Ntuli, unobhala walo esifundazweni iGauteng uMnu Alco Ngobese nabanye abaningi.
UMnu Hlabisa uthe iReserve Bank bayinika izinsuku eziwu-21 zokuba iphendule futhi ihlinzeke ngohlelo oluqondile okuzosentshenzwa ngalo ukuze kuhlengwe leli bhange ezinkingeni elinazo.Â
UHlabisa uphawule ngodaba lokuhlehliswa kokwethulwa kwesabelo-mali obekufanele kwenziwe ngungqongqoshe woMnyango wezeziMali kuleli uMnu Enoch Godongwane.
Uthe leli qembu kalihambisani nokukhushulwa kwentela okuhlongozwayo.Â
“I-IFP kayihamnisani ngisho nakancane nesiphakamiso sokuba kwenyuke intela ngamaphesenti amabili. Siyi-IFP sizosebenzisa izinhlaka esinazo ukuze senze iziphakamiso zokuba kubhekwe kwezinye izindawo kungabi wukuthi kwenyuswa intela. Siyakholelwa ekutheni zikhona ezinye izindawo okungabhekwa kuzo ukuze kuthuthukiswe umnotho wakuleli. Lesi yisikhathi esihle sokuba kubonakale amandla evoti elanikwa i-IFP,” kusho uHlabisa.
Uhlu lwezikhalo zaleli lwamukelwe nguNkk Fatima Boubet ozethule ngokuthi uyisisebenzi se-Reserve Bank.
“Ngiyaluthatha uhlu lwezikhalo. Ngizokwenza isiqiniseko sokuthi lomyalezo ufinyelele ekomkhulu namuhla. Ngizofika ngisho nokuthi i-IFP ibe ibambe imashi enokuthula,” kuphetha uBoubet.
