IHLOMULE ngamalungu amasha aqavile kwezombusazwe Inkatha Freedom Party (IFP). Lokhu kugqame ngoLwesihlanu eDurban Manor ngesikhathi uSihlalo we-IFP KwaZulu-Natal,uMnu Thami Ntuli emukela amalungu amasha ahlubuke emaqenjini awo ajoyina iNkatha.
Angaphezulu kuka-150 amalungu amukeliwe ngokusemthethweni. Iqembu elilahlekelwe kakhulu abaholi abaqavile, i-Economic Freedom Fighters (EFF). Kwamukelwe obeyikhansela noSihlalo wesiyingi se-EFF eThekwini uMnu Tholinhlanhla Mthiyane, obengusekela sihlalo wesiyingi oThukela kwi-EFF uNkz Lungelo Khumalo, obenguSihlalo we-EFF kwisiyingi eKing Cetshwayo uMnu Phumlani Gumede, obenguNobhala kwiWard 106 Kwi-EFF uNkt Zanele Biyela, obeyikhansela le-Democratic Alliance eNtuzuma eThekwini nabanye abaningi. Amaqembu alahlekelwe kubalwa kuwona i-African National Congress (ANC), ATM, DA, EFF noMkhonto Wesizwe.
USihlalo weNkatha Freedom Paryt uMnu Thami Ntuli, uthe ukujoyina kwamalungu amasha ikakhulukazi intsha okuyiyona ebekade igcwele, kusho ikusasa eliqhakazile kule nhlangano. Uthi sekuyabacacela abantu abaningi ukuthi inhloso yepolitiki, akusikhona ukugqoka isikibha nokucula amaculo, kodwa kusho ukubekwa phambili kwentuthuko kubantu nokushintshwa kwezimpilo zabantu zibengcono.
Mthobisis@ilanganews.co.za
