IKHOMISHINI yezoKhetho eNingizimu Afrika (IEC) ithi iKwaZulu-Natal, ingesinye sezifundazwe ezibe nezibalo eziphezulu zabantu ababhalisele ukuvota, izolo ngoMgqibelo. IPhini loMphathi we-IEC, uMasego Sheburi, esithangamini sabezindaba, uthe iKZN, iGauteng, ne-Eastern Cape, yizona zifundazwe ezibe nezibalo eziphezulu, zababhalisela ukuvota njengoma kuqhutshekwa nanamuhla.
KwaZulu-Natal, ziwu-5000 izikhungo obekubhaliselwa kuzo ukuvota. I-IEC ithi yize kwezinye izindawo amakhaza abeshubisa umnkantsha, abantu baphumile bayobhalisela ukuvota. Ithi lababhalisile ngabantu abasha nabesifazane.
UMphathi we-IEC esiFundeni iKing Cetshwayo, uNksz Thule Dlamini, uthi akubangakhona zihibe, njengoba bekunokusebenzisana okuhle phakathi kwabamele i-IEC, abamele amaqembu epolitiki (party agents), amaphoyisa, nabantu abebeyobhalisela ukuvota.
“Kuzona zonke izikhungo ezikomasipala abangaphansi kweKing Cetshwaayo, ayikho imibhikisho yomphakathi ebekhona. Izikhungo zivulwe ngesikhathi, kuzona zombili izinsuku zokubhaliswa. Ngokombiko siwuthole emaphoyiseni, bekukhona ukubekezelelana, nokuzwana, emaqenjini epolitiki ehlukene, abegxumeke amatafula emigwaqeni eseduze kwezikhungo zokuvota, ekhuthaza abantu ukuthi babhalisele ukuvota, ” esho.
I-IEC ithi kuzoba nelinye ithuba lokubhalisela ukuvota, elizovuleleka ngempelasonto yangoNcwaba (August), esazomenyezelwa. Ukhetho luzoba ngoLwesithathu, lomhla ka-4 kuLwezi (November).
MENZI JELE
NGOKWE-IEC ABASE-KZN, BAKHOMBISE ISASASA LOKUBHALISELA UKUVOTA.
