I-ORLANDO Pirates isinqume ukusheshe imdedele umqeqeshi wayo uJose Riveiro, singakafiki isikhathi obekuvunyelwene ukuthi uzoshiya ngaso, okuwukuphela kukaNhlangulana (June).
Ngokusho kwesitatimende esikhishwe yile kilabhu namuhla ngoMsombuluko, kuzokube kungokokugcina uRiveiro ehleli ebhentshini, njengoba bezobhekana neLamontville Golden Arrows koweBetway Premiership kusasa ngoLwesibili ngo-19h30 e-Orlando Stadium, eSoweto.
Usihlalo weBucs u-Irvin Khoza uthe: “UJose uze kithina emasontweni edlule, wacela ukusheshe akhululwe ngaphambi kokuphela kwenkontileka yakhe njengoba esesayine kwenye ikilabhu.”
Kwenzeka lokhu nje, amaBhakaniya asazikhotha amanxeba kulandela ukuguqiswa ngo-2-1 ngomkhaya bawo iKaizer Chiefs kowamanqamu weNedbank Cup eMoses Mabhida Stadium eThekwini ngoMgqibelo.
Kusasa azolwela ukuvala igebe kwiMamelodi Sundowns esisele ngephuzu elilodwa inqobe iligi okuzokube kuyihlandla lika-8 kulandelana. IPirates isalelwe yimidlalo emihlanu okumele iyinqobe yonke ngenqwaba yamagoli, bese iDowns idliwa kule midlalo emibili eyisalele ukuze yone umcimbi wamaSandawana, okubukeka kuwumqansa onzima kakhulu.
