UPHIKO lwezokushushisa eNingizimu Afrika iNational Prosecuting Authority (NPA) kulindeleke ukuthi luhoxise ngokusemthethweni amacala abebhekene noLt Gen Dumisani Khumalo noBrigadier Dineo Mokwele nabanye abasolwa nabo.
UKhumalo nabanye baboshwa ngoNhlangulana nyakenye bathweswa amacala athinta ukuqasha ngokungemthetho uMokwele.
Ukuhoxiswa kwala macala kulandela ukuvela kweNhloko yophiko oluphenya amacala enkohlakalo i-IDAC uNkk Andrea Johnson phambi kwekhomishana kaMadlanga okushiye imibuzo eminingi ngendlela lolu phiko elisingatha amanye amacala athinta izikhulu zamaphoyisa.
Ubufakazi obuvele kule khomishini buveze ukuthi ukuboshwa kukaKhumalo, Mokwele nabanye kwakuyingxenye yetulo lokubabophela amanqina enyathi ngenhloso yokubagudluza ezikhundleni abebeziqhoqhobele.
Kusukela baboshwa uKhumalo, uMokwele nabanye bebelokhu beziphike njalo izinsolo abasolwa ngazo.
Kubikwa ukuthi ukuboshwa kwabo ikhona okwasukumisa uKhomishana wamaPhoyisa KwaZulu Natal uLt Gen Nhlanhla Mkhwanazi ukuba abize isithangami sabezindaba sangoNtulikazi.
Kulesi sithangami uMkhwanazi waneka amanyunduluu aqhubekayo emnyangweni wamaphoyisa, ophikweni lokushushisa kanjalo nokugxambukela kwesandla semfene engalweni yomthetho.
Isona lesi sithangami esiholele ekutheni kusungulwe iKhomishini kaMadlanga esaqhubeka nokuveza la manyundululu kanjalo nekomidi lasePhalamende i-Adhoc eselawuphothula umsebenzi walo kwazise sekulindeleke likhiphe umbiko ogcwele ngophenyo lwayo.
Ngakolunye uhlangothi iKhomishini kaMadlanga isaqhubeka nokuthola ubufakazi njengoba kulindeleke ukuthi yona iphothule ukusebenza kwayo ekupheleni kukaMfumfu nonyaka.
