THANDOLUHLE NGUBO
ITHATHE izeluleko kubammeli asebemkantshubomvu kwezomthetho iNhloko yabashushisi e-Eastern Cape, uMnu Barry Madolo, yanquma ukuphonsela inselelo isinqumo seNkantolo eNkulu yaseGqeberha esakhipha umfundisi uTimothy Omotoso phambili emacaleni awu-32, okubalwa kuwo awokudlwengula, ukushushumbiswa kwabantu namanye abebhekene nawo.
Lokhu kuvezwe umkhulumeli wenhlangano eyengamele ukushushiswa kuleli iNPA, uMnu Mthunzi Mhaga.
“Ukuphonsela isinqumo senkantolo bekudinga isikhathi nemibono yezazi zomthetho. Phezu kwalokho lolu udaba olubucayi bekudingeka nokucwaningwa kwamarekhodi okwenzeke enkantolo kuleminyaka. Ngemuva kwakho konke lokhu siyi-NPA sikholwa ukuthi isicelo sethu sizoba yimpumelelo,” kusho uMhaga.
U-Omotoso nabababili abeboshwe nabo okunguLusanda Solani noZukiswa Sitho batholwa bengenacala yiJaji u-Irma Schoeman ngenyanga eyedlule. U-Omotoso ukhululwa nje ubesehlale iminyaka ewu-8 estokisini.
