ISIKHUNGO esiqoqa intela eNingizimu Afrika, iSouth African Revenue Service, sesiqalile ukuqinisa amatomu kosaziwayo abasikweletayo. Ngokubika kweTimesLive, lokhu kulandela ukuthi lesi sikhungo sikhiphele usaziwayo uBonang Matheba incwadi yomnqamulajuqu.
Ngonyaka owedlule lesi sikhungo sakhipha umyalelo kosaziwayo nalabo abasebenza njengama-influencer ukuba baphumele obala ngemali abayitholayo ngokusebenza kwabo, okuhlanganisa nemali abayitholayo kubaxhasi ukuze bakwazi ukuba ngabakhokhi bentela abasemthethweni.
Phambilini uKhomishana walesi sikhungo uMnu Edward Kieswetter, waveza ukuthi bazimisele ukusebenza ngokubambisana nosaziwayo, nalabo abasebenza njengama-influencer ezinkundleni zokuxhumana, ukuqinisekisa ukuthi bayilandela yonke imigudu efanele, bakhokha intela ngemali abayitholayo ngemisebenzi yabo.
Waveza ukuthi kubalulekile ukuthi konke abakwenzayo kube sobala, futhi kuhambisana nomthetho wokuqoqwa kwentela kuleli. UBonang ungomunye wosaziwayo abangaconsi phansi kuleli, njengoba egabe ngabalandeli abangaphezulu kuka-10 million ezinkundleni zokuxhumana ezahlukene.
Baningi osaziwayo asebeke bazithola bephambene nengalo yomthetho, ngokukweleta lesi sikhungo. Phakathi kosaziwayo asebeke bazithola bekweleta lesi sikhungo kubalwa iqembu iTKZee, usomabhizinisi uShauwn Mkhize, uThapelo Mokoena, uMinnie Dlamini nabanye.
