PHUMLANI GAMA
ZIQINILE ezokuphepha ngaphandle nangaphakathi eNkantolo yeMantshi yaKwaNongoma njengoba kulindeleke ukuba kungene icala lezikhulu zikaMasipala waKwaNongoma.
Lo masipala uqophe umlando ongemuhle amaphoyisa ebopha iMeya yawo uMnu Mshangane Ndabandaba, isekela lakhe uMnu Sabelo Nkosi, noNkk Babongiwe Sithole onguSomlomo. Lezi ziphathimandla ziyanyaniswa necala lenkohlakalo yemali elinganiselwa ku-R800 000.Â
Lezi zikhulu zishaqwe ngamaphoyisa zisemhlanganweni wesigungu salo mkhandlu (Exco) ngoLwesihlanu.
Ngaphandle nangaphakathi enkantolo kunamalungu emindeni yabasolwa, amalungu omphakathi nabalandeli bamaqembu ezombusazwe. UMasipala waKwaNongoma ubunjwe ngamaqembu ezombusazwe ahlukene. UNdabandaba uyimeya ngethikithi leNFP, uNkosi uyilungu le-EFF kanti uNkk Sithole yena uyilungu le-ANC.
Laba baholi kulindeleke ukuba bafake izicelo zokudedelwa ngebheyili khona namuhla.
