KULINDELEKE ukuba ivele ngoLwesihlanu eNkantolo yeMantshi yaseMzimkhulu ‘inkabi’ esolwa ngosebenzisana nephoyisa lase-siteshini saseMzimkhulu oSayitsheni Ntokozo Mngqithi, obhekene necala lokubulala ingoduso yakhe uSayitsheni Ntombi Mbanjwa, eyayiyiphoyisa khona eMzimkhulu, eyadutshulwa yabulawa isemzini wayo ngonyaka owedlule.
Ngokusho kuka-Col Simphiwe Mhlongo, ongumkhulumeli woKlebe KwaZulu-Natal ‘le-nkabi’ eneminyaka ewu-36 ibanjwe endaweni yase-Mpolweni ngase-Mgungundlovu.
ILANGA laba ngelokuqala ukubika ngalolu-daba ngesikhathi kuboshwe uMngqithi owashaqwa oKlebe esemsebenzini ngo-November wonyaka ophelile, wabe esenqatshelwa ibheyili ngomhlaka phakathi no-December.
Kuzokhumbuleka ukuthi ngosuku okwakulindeleke ukuthi kuphume ngalo isinqumo odabeni lwebheyili uMngqithi waqala esiteshini samaphoyisa eyokwethweswa amacala amabili okungelenkohlakalo kanye nelokuphazamisa ukusebenza kwengalo yomthetho phezu kwamabili ayenawo okungelokubulala nelokwakha itulo lokubulala.
Kwelenkohlakalo wayesolwa ngokugwazisa umshayeli weloli eyadala ingozi yabulala abantu abawu-7.
Kuthiwa watshela umshayeli ukuthi akamnike u-R60 000 ukuze anyamalalise idokodo, nebala umshayeli wafaka u-R30 000 kwi-account yakhe yasebhange, okwathi sekungena icala enkantolo kwatholakala ukuthi kunobufakazi obusemqoka obushodayo kwaphoqa ukuba icala lihoxiswe.
Amalungu emindeni yabafi yalivula kabusha icala laphenywa elinye iphoyisa elasola isandla semfene, icala ladlulela ko-Klebe kwabe sekuboshwa uMngqithi.
