EMUVA kokusabalala kwemibiko yokuthi indodakazi kaMnu Jacob Zuma owayengumongameli wakuleli, egane iNgonyama uMakhosetive “Mswati III” Dlamini, ibophe imithwalo yabuyela kubo, sekuvele eminye imibiko, ethi ibuyele emendweni.
Emasontweni amabili edlule ubesematheni uNomcebo Zuma, kuthiwa uthele iNgonyama ngehlazo ebaleka esigodlweni eMankanyane, eSwazini, wabuyela kwaDakwadunuse eNkandla, ekhala ngokunganakwa.
INgonyama uMswati kudingeke ukuba ize ijube ithimba ukuba liyomlanda uNomcebo eNkandla. Ngokubika kwakamuva kwephephandaba lesiNgisi lakuleliya lizwe, iSwaziland News, uNkk Zuma-Dlamini uqale ukubonakala ngoMgqibelo esikhumulweni sezindiza iSikhuphe, eyingxenye yondlunkulu beNgonyama uMswati III, abebeyokwamukela umyeni wabo obefika, ngemuva kohambo lwaseGhana naseSpain.
Uthando lukaNkk Zuma-Dlamini neNgonyama Mswati III beluvutha amalangabi, kukhulunywa ngalo ngisho nasezinkundleni zokuxhumana. Kwavela imibiko yokuthi iNgonyama yakhithizela uNomcebo izipho ezibizayo, okubalwa kuzona nemoto yohlobo lwakwaMercedes-Benz, ebiza ngaphezulu kuka-R4 million nesipho semali ewu-R2 million.
INgonyama uMswati III inamakhosikazi awu-16, nezingane ezibalelwa ngaphezulu kuka-50. Kunemibiko yokuthi usuyaphothulwa umsebenzi wokwakhiwa kwesigodlo sikaNomcebo eDlangeni, eSiteki, bude buduze nedolobha iLomahasha, elakhiwe eduze komngcele owehlukanisa iSwazini neMozambique.
phumlani@iloanganews.co.za
