IKAIZER Chiefs ihlose ukuhlikihla usawoti esilondeni esibhibhayo seMamelodi Sundowns emdlalweni weBetway Premiership namuhla ngoLwesithathu ngo-19h30 eFNB Stadium, eSoweto.
IChiefs izobhekana namaSandawana asazikhotha amanxeba njengoba ewashiswe ijezi kabuhlungu yi-Orlando Pirates ewakhiphe ngo-4-1 wamaphenathi kwi-semi final yeMTN8 ngoMgqibelo eLucas Moripe Stadium, e-Atteridgeville.
Ngakolunye uhlangothi, iziMpofana zisefomini enhle kulezi zinsuku njengoba zingakaze zehlulwe emidlalweni emithathu eseziyigijimile yeligi, futhi zingakaze zingenelwe yigoli.
UKhalil Ben Youssef (osesithombeni) ongumsizi kaNasreddine Nabi, ongumqeqeshi – okulindeleke ukuba akhuze ibuya ngalo mdlalo – uthi bahlose ukuqhubeka lapho begcine khona nomgqigqo wabo.
“Kumqoka kithina nakubadlali ukuba sibe nokukhulu ukuzethemba njengoba siya kulo mdlalo. Kuningi okusafanele sikwenze kule kilabhu, njengamanje ngingasho ukuthi siku-60% kuya ku-70% endleleni esidlala ngayo.
“Kunezinto eziningi okufanele sisebenzele phezu kwazo kwazise kunabadlali abasha okufanele nabo baqhamuke nesixazululo ekilabhini. Sigculisekile emuva, lokho ku-fanele ngikuveze.
“Kodwa-ke njengoba siya kulo mdlalo, inhloso wukuqhubeka no-mgqigqo wethu wokunqoba imidlalo. Singakwenza lokho ngoba sisekhaya, esikucelayo wukuthi abalandeli bethu basifake kakhulu umfutho kunakuqala,” esho.
Lo mqeqeshi ukuqinisekisile ukuthi uNkanyiso Shinga, u-Ethan Chislett noFlavio Silva sebekulungele ukugijima lo mdlalo futhi bangabanye babadlali asebenga-khetha kubona uma sebebophela isikimu, kwazise zonke izimfanelo zabo seziqondile.
Isiyonke imidlalo yeBetway Premiership Namuhla ngoLwesithathu iqhathwe kanje:-
EKing Zwelithini Stadium: Golden Arrows vs Magesi 19h30.
EPeter Mokaba: Sekhukhune United vs AmaZulu 19h30.
E-FNB Stadium: Kaizer Chiefs vs Mamelodi Sundowns 19h30.
