IZIGWAZE ngowayo iMamelodi Sundowns iphunyukwa yithuba lokuqukula isicoco seCaf Champions League, iguqiswa ngo-2-1 yiPyramids FC yaseGibhithe emlenzeni wesibili wowamanqamu izolo ngeSonto ebusuku ekuhambeni.
Kube wu-3-2 sekuhlanganiswe imiphumela njengoba umlenze wokuqala obuseNingizimu Afrika uphele zibambene ngo-1-1. IPyramids yiyona evule inkundla ngegoli likaFiston Mayele, ngemuva kwephutha likaGrant Kekana weDowns emuva. Elinye igoli losokhaya lishaywe ngu-Ahmed Samy, kwathi eleDowns lashaywa ngu-Igraam Rayners.
Umqeqeshi wamaSandawana uthi bazovuka bazithintithe, babuye bengcono kakhulu kulo mncintiswano ngesizini ezayo.
“Khona angijabule njengoba sidliwe kowamanqamu kodwa lokho akusho ukuthi angiziqhenyi ngesikwenzile size sifike lapha. Ngiyaziqhenya ngabadlali bami futhi badlale ngokuzinikela. Kube yiziqhutshana ezimbili ezintathu, senza amaphutha asiphuthisele ngenkomishi,” esho
Ubongele izitha, wathi bezikulambele ukunqoba ukwedlula bona.
“Okumqoka manje wukuthi sibuyela emuva, sizibekele izinto ezintsha esifuna ukuzizuza kule sizini ezoqala, bese sibuya sesingcono kakhulu.”
Bekuyifayineli yesibili kulandelana imphutha uCardoso njengoba nyakenye edliwe yi-Al Ahly yaseGibhithe, eqeqesha iEsperance yaseTunisia.
