BHEKI NDLOVANA
UMENGAMELI wezwe uMnu Cyril Ramaphosa, uthembisa ukuthi bazoqhamuka nohlelo oluzolekelela ekutheni omasipala baseNingizimu Afrika basebenze ngendlela efanele.
Ekhuluma ngesikhathi ethula inkulumo yesizwe (SONA) ngoLwesine kusihlwa eCape Town, uRamaphosa uthe emadolobheni amaningi ezweni lonke, imigwaqo ayilungiswa, ukuhlinzekwa kwamanzi nogesi kuvame ukuphazamiseka, udoti awuqoqwa, futhi indle igeleza emigwaqweni.
Ubalule ukuthi enye yezinto edala ukuba omasipala bangasebenzi ngendlela efanele wukuthi komasipala abaningi kushoda izisebenzi ezinamakhono nobungcweti obudingekayo, kanye nezinsiza ezidingekayo ukuze kuhlangatshezwane nezidingo zabantu.
Uqhube wadalula nokuthi enye inkinga ekhona wukuthi omasipala abaningi, imali abayitholayo emphakathini ngokuhlinzeka izidingo, abayitshali kabusha ekulungisweni kwengqalasizinda.
Uthi kusukela kulo nyaka, bazosebenzisana nomasipala ukusungula uhlelo oluzophathwa ngendlela enobungcweti, lokuqikelela ukuhlinzekwa komphakathi ngamanzi nogesi, kanye nokuthi kunotshalomali olwanele lokulungiswa kwengqalasizinda.
Uphawule ngeTheku wathi kubabonaka umehluko kuleli dolobha njengoba kwenziwe uhlelo lokusebenza ngokubambisana, olubandakanya uhulumeni, osomabhizinisi, nezinye izinhlangano zomphakathi.
