IGABE ngabalingisi abanohlonze ifilimu yokuqala ekhiqizwe isiteshi sikamabonakude esesizakhele udumo ngokudlala amafilimu aphesheya ngolimi lwesiZulu iMovie Room etholakala kwiDStv Channel 113.
I-Movie Room isiteshi sikamabonakude esesizakhele udumo ngokudlala amafilimu okubalwa kuwo iJumanji, White Chicks, Diary Of Mad Black Woman namanye ngolimi lwesiZulu nosekwenze ababukeli bakuthokozela ukubona la mafilimu.
Lesi siteshi simemezele ukuthi sesiqalile ukuqopha ifilimu yaso yokuqala yakuleli ezobe igabe ngabalingisi abanohlonze bakuleli.
Le filimu ezobizwa ngeThuli’s Doek izobe igabe ngabalingisi okubalwa kubo uMbalenhle Mavimbela, Linda Sokhulu, Lindani Nkosi, Rorisang Mohapi, Vuyo Biyela, Slindile Nodangala nenkakha uMagic Hlatshwayo.
Kulindeleke ukuthi yethulwe ngokusemthethweni ngasekupheleni kukaJuly njengoba izoba ukukhonjiswa ngo-August nonyaka.
Ngokusho kwesitatimende salesi siteshi le filimu izobe ikhuluma ngesihloko sesithembu nezinkinga abesifazane abahlangabezana naso esithengisini okuhlanganisa nencindezelo yosiko kwabesifazane abangakwazi ukuzala.
Isikhulu salesi siteshi uThokozani Nkosi uthe ukwethulwa kwe-Thuli’s Doek kuyigxathu elimqoka kwiMovie Room ngoba kuhambisana nombono wokuqhakambisana izindaba zase-Africa futhi zixoxwa ngendlela yakuleli lizwekazi,” kusho uNkosi.
Uthe ababukeli balesi siteshi sebekhombisile ukuthi bayakuthokozela ukubuka amafilimu adlala ngolimi lwabo.
“Ngale filimu sizobe sisaqhubeka nokubanikeza abakufunayo kodwa kulokhu sizobe sesibethulela ifilimu entsha abazobe beqala ukuyibona kulesi siteshi engakaze ikhonjswe ndawo,” kusho uNkosi.
Le filimu izokhiqizwa inkampani i-Eclipse Television Productions
