USENIKA abanye ithuba lokukhula kwezokuphathwa kwemicimbi kamaskandi umsakazi woKhozi FM, uZimiphi “Zimdollar” Biyela, osethi khumu ekuphatheni izinhlelo zayo.
Uthi sekuyisikhathi sokuthi abaphathi bezinhlelo abasakhasa banikwe ithuba lokuzithuthukisa kulo msebenzi. Utshele ILANGA ukuthi njengoba esegxile nakwezamabhizinisi, nawo asemxake kakhulu.
Uthe usezimisele ngokubhekana ngqo namabhizinisi, njengoba esevule amakhemisi esintu, ezibizwa nge-UKM Organics KwaMaMkhulu.
“Baningi abantwana abakhulayo, okubukeka benentshisekelo yokufika kuleli zinga ebesikulona kwezokuphathwa kwemicimbi. Sengimdala, amadolo kawasavumi, ngeke ngikwazi ukusebenza ebusuku emicimbini yomaskandi,” kusho uZimdollar.
Utshele leli phephandaba ukuthi imicimbi okungeyona eyomculo kamaskandi, uzoyemukela. Uthe uma ufuna ukuphatha ngempumelelo imicimbi kamaskandi, kufuneka ukuthi wazi nomculo oshisayo wabaculi ngaleso sikhathi.
“Kangisenaso isikhathi sokulalela amaciko, ngixakekile empilweni, kumele ngibale amasenti engiwathola ngebhizinisi lami manje. Okunye okufanele kube sobala, wukuthi isikhathi siyafika sedlule empilweni. Kunabahleli bemicimbi enginobudlelwano obuhle nabo, asebezophoqeleka ukuba bangiqashe noma ngabe kangisekho ematheni, ngenxa yokuthi nje bavikela ubudlelwane bethu.
“Akulona icebo elihle lelo. Ngifuna nje bakhululeke abahleli, baqashe umuntu odingekayo ngaleso sikhathi, ozokwazi ukuqoqa izihlwele,” esho.
Uthi njengoba esevule izitolo ezilinganise-lwa ku-10 ezindaweni eziningi, kuningi okufanele abhekane nakho. Ngesonto eledlule uvule isitolo esisha eMpangeni, mhla ka-15 kwephezulu uzosivula ePretoria, mhla ka-2 kuNhlaba (May) uzosivula eNewcastle. Okwamanje unezitolo eSoweto eBara, eGoli; eRichards Bay, eMgungundlovu, eThekwini eSphingo Mall, ePinetown nakwezinye izindawo.
“Akukho okubi okwenzekile phakathi kwami nabahleli bemicimbi,” kusho uZimdollar. Uthe isikhathi esiningi usesisebenzisela ekwenzeni ucwaningo ngamakhambi esintu, azosiza abantu bese ewafaka ezitolo zakhe.
