KUVUSE inhlanganisela ezodlisela ogageni emculweni ukuhlanganyela kwabaculi abathathu be-hip hop baseMgungundlovu abasanda kukhipha i-EP esihloko sithi PMB-Ville Vol 1.
Ukuhlangana kukaThe Dope Kid ogama lakhe langempela uThubelihle Shezi, u-HB (Hlupho Boy) onguMthokozisi “Pa” Mthembu noTwostep onguSethula Shezi abangabaculi abazimele ngokwabo, baqhamuka neqembu elibizwa ngeSBlack Entertainment kukhiqizeke le albhamu egabe ngezingoma ezahlukene.
Le EP yethulwe ngokusemthethweni ngenyanga eyedlule emcimbini wekhethelo obuse Intulo Lifestyle eHilton ngaphansi kwaseMgungundlovu.
Bobathathu laba baculi sebeqalile ukuzakhela igama emculweni njengoba sebeke bazikhipha izingoma ngokuzimela.
UTwostep ozalelwe eThekwini kodwa wakhulela eMgungundlovu uqale ukuzakhela igama kulo mkhakha ngokungenela imincintiswano efana neRussian Bear Are You Next?, Reeboost neMTN Megastar.
Kulapho ekwazile ukuhlangana nezinye izinkakha zomculo wehip hop okubalwa kuzo uK.O noKwesta.
UThe Dope Kid ongowokudabuka Emvundlweni yena uqale esasesikoleni ukungena kulo mkhakha.
Ukungena kwakhe kulo mkhakha ukhuthazwe ngabaculi bangakubo abebekhobisa ukungenisa kulo mkhakha. Useke wasebenza nabanye abaculi okubalwa kubo uKnown Stranger engomeni esihloko sithi Asikuzwa, neHeavesn Gates engomeni ethi Gabi Gabi.
UHlupho Boy uchithe iminyaka ezakhela igama kulo mkhakha ephusha umshikashika womculo wehip hop.
Ngo-2019 wakhipha i-albhamu yakhe yokuqala esihloko sithi UyiHlupho Boy egabe ngezingoma ezingu-15.
Useke wanandisa esiteji esisodwa nabanye abayizintandokazi kulo mkhakha okubalwa kubo uDuncan, Zakwe, Touchline, Big Zulu, Nasty C nabanye.
Kule EP kupikwe abanye abaculi abacula nabo laba okubalwa kubo uZakwe, Duncan, Loki, Touchline, Ginger Trill, Duss Wavy, Sastii nabanye.
Umphathi weSBlack Entertainment uNkosinathi “Gates” Shezi uthe ngale EP bebehlose ukukhombisa amandla obumbano nokubambisana emculweni we-hip hop.
Ngale alebhamu bahlose ukubeka uMgungundlovu kwibalazwe lomhlaba njengoba behlanganyele nabaculi bakwezinye izindawo ngenhloso yokuthi bangagcini bengabakuleli dolobha kodwa basabalale njengezimpiko zokhozi.
Izingoma ze-SBlack Entertainment ethi Asambe nethi Ngiyak’thatha seziqalile ukuzwakala emisakazweni eyahlukene kanti nama-music video azo aseqalile ukubonakala ezinhlelweni zikamabonakude zomculo.
