UNIKEZWE ikhefu uFelix Hlophe ongumsakazi weGagasi FM osematheni kulezi nsuku kulandela ukusabalala kwezindaba ezithinta ingxabano nomndeni kamngani kankosikazi wakhe ngobusuku obandulela uKhisimusi.
UHlophe kule video esabalele ezinkundleni zokuxhumana lapho ebonakala ezofuna unkosikazi wakhe uNkk Tracy Smith komunye umuzi nezingane zakhe.
Kule video uzwakala enengekile ngokuvakasha kukaTracy nezingane zakhe kulo muzi njengoba ekhombisa ukungawuhloniphi ngenxa yokuthi ngokusho kwakhe ayikho indoda kuwona.
Esitatimendeni esikhishwe iGagasi FM siveze ukuthi lo msakazo usuthathe isinqumo sokunikeza lo msakazi ikhefu kuze kushaye umhla ka-19 engazwakali emoyeni.
UHlophe ushayela uhlelo lwasekuseni kulo msakazo olubizwa ngokuthi The Uprising noMinnie Ntuli isikhala sakhe sizovalwa nguHeazy.
UHlophe ngeke azwakale futhi nasohlelweni olubhekwe ngabomvu lokuhlukanisa unyaka abezolushayela nenkakha yomsakazi uLinda Mr Magic Sibiya noSelbyonce.
Ngokusho kwalesi sitatimende lolu hlelo seluzoshayelwa nguMr Magic noSelbyonce kuphela.
Kuzokhumbuleka ukuthi kuwona lo nyaka lo msakazo uke wamisa uzakwabo kaHlophe ohlelweni lwasekuseni uMinnie ngenxa yokuhluleka wukuziphatha ohlelweni lukamabonakude iThe Real Housewives of Durban.
