UKUSHINTSHA kwezikhathi nendlela yokuphila, kunomthelela ezintweni eziningi zesintu. Kulokhu singabala nokushuqula, abanye abakubuka njengento ebalulekile okumele yenziwe ngowesifazane osuke eseganile.
Nokho ngenxa yokushintsha kwezikhathi, lokhu sikubona kushintsha. Abanye bayahloniphisa ekhanda uma kunesidingo, uma kungenjalo bazihambele ngezinwele zabo. USolwazi uJabulani Maphalala, ongungoti wesintu, uchaza ngomlando wokushuqula kwabesifazane nokuguquka kwezikhathi.
“Kudala abesifazane abaganile bebethwala izicholo, kukhona lezi eziwubhojozi, bese kuba khona lezi ezendlalekile ezitholakala ikakhulukazi ezindaweni zakoMsinga – zazigqokwa nesidwaba. Bese kuthi abangaganile bona babenza lokhu esikubiza ngezimpithi ekhanda, kepha amatshitshi ayengaziluki,” esho.
Uthi lokhu kwakwenzelwa ukuba owesifazane abonakale ukuthi ukusiphi isigaba. Nokho ngenxa yokuguquka kwezikhathi, uthi lokhu kakusenzeki ngoba kakusefani nakuqala. Uthi sekuba kumnumzane walowo muzi ukuthi uxoxisana kanjani nowakwakhe.
“Esikhathini samanje izinto seziguqukile. Uzokhumbula nokuthi abesifazane kusukela kwakudala, yibo abebeqhamuka nezinguquko, bese amadoda elandela ngemuva. KwaZulu inhlonipho igxile emahlombe, hhayi ekhanda.
“Ngalokhu ngisho ukuthi usengahlangana nowesifazane wasemakhaya engashuqulile, kepha uthole ukuthi kukhona akugaxe emahlombe. Ngisho ungayaphi, amahlombe uzowafica ehloniphekile,” echaza.
Esikhathini samanje abesifazane okujwayeleke ukuthi babonakale beshuqulile kuyaye kube ngabashadile, ngenhloso yokuhlonipha abasemzini, noma abazikhonzele ukushuqula. Kanti kwabanye bashuqula uma kunesimo esithile esiphoqayo – mhlawumbe uma kushoniwe noma kunomcimbi wesintu.
Nokho okuphawulekayo kwezemfashini wukuthi abesifazane bakukhonzile ukushuqula; lokhu kubonakala ngemisiko abayigqokayo esuke ihambisana nabakugqokile. Muva nje, kuke kwaba nempikiswano ezinkundleni zokuxhumana lapho kubonakale khona uNdlunkulu uSihle Mdhluli ehamba ngekhanda.
Abanye baphawule ngokuthi kumele engabe uyahloniphisa ekhanda ngoba useyinkosikazi. Nokho uSolwazi uMaphalala ukucacisile ukuthi lokhu kuba yingxoxo ephakathi kwabaganene.
“Omunye usuke ezovumelana nomyeni wakhe ukuthi ushuqula iduku uma kunjani, njengoba ngicacisile ukuthi KwaZulu inhlonipho isemahlombe ikakhulukazi, hhayi ekhanda.”
