UMSAKAZO ozinze KwaZulu Natal iGagasi FM usuphumele obala waphawula ngokuziphatha kukaMinnie Ntuli ohlelweni lukamabonakude iReal Housewives of Durban (RHOD) olukhonjiswa esiteshini esingaphanzi kweMultichoice iShowmax.
Ukuziphatha kukaMinnie kulolu hlelo kususe izinkulumo ezinkundleni zokuxhumana abantu bashiya abangalazi ngaye abanye baze baphakamisa nokuthi akhonjwe kulo msakazo.
Kulolu hlelo uMinnie ubonakale exabana nomunye wozakwabo uLondie London nokuqale ngokuqophisana kwamagama ngaphambi kokuthi kuze kudlulele.
UMinnie ube esebonakala esuku eyophusha uLondie esiphongweni ngomunwe.
Eqhubeka nokumusho ngamagama ayisiswana. Kanjalo noLondie nakuba ebehleli phansi esonge izandla ngesikhathi lokhu kwenzeka kodwa ubengathuli njengoba naye ebenamagama awaphimisayo amanye ayinhlamba.
Nakuba uMinnie agcina ngokuziphatha kwakhe kulolu hlelo phambilini kodwa isiqephu sangoLwesihlanu kulolu hlelo sokubuyisana siveze olunye uhlangothi olwabe lungavelanga phambilini.
Esitatimendeni esikhishwe iGagasi linxuse kwehle imimoya njengoba lisabhekana nalesi simo sokuziphatha kwalo msakazi.
Lo msakazo udalule ukuthi awuhambisani nhlobo nobuqhwanga lwanoma iyiphi inhlobo futhi uyakholelwa ekukhuthazeni ukubuyisana.
Okhulumela iGagasi uKhulekani Shandu uthe njengomsakazo bazokweseka uhlelo lokukhuthaza ukuxolelana nokubuyisana.
Uqhube ngokuqinisekisa abalaleli, amakhasimende nabayingxenye yalo msakazo ukuthi lolu daba balusingatha ngendlela ephezulu futhi emqoka.
Ube esecela kwehle imimoya njengoba besabhekana nalolu daba ngendlela ehambisana nesixazululo esinokuthula.
