UMnyango wezokuThutha kuzwelonke uthi usezinhlelweni zokwelula isikhathi samalayisensi okushayela izimoto, sisuke eminyakeni emihlanu siye kwewu-8.
Lokhu kuza ngemuva kwezikhalo zomphakathi ngokubambezeleka kokubuya kwamakhadi abo okushayela, ngenxa yezinkinga ezithinta umshini wokuwagaya, okuyiwona wodwa ezweni lonke.
Umnyango utshele abezindaba ukuthi iDriving License Card Account, okuyinhlangano ebhekelele ukukhiqizwa kwamakhadi okushayela, iyasicubungula lesi siphakamiso. Uthi uma seluphothuliwe lolu hlelo, umnyango uzoxhumana nezinhlaka ezithintekayo ngaphambi kokuthumela isiphakamiso ePhalamende.
Ngokombiko weMybroadband, izindleko zokukhiqizwa kwamalayisensi okushayela zingenisela uhulumeni imali elinganiselwa ku-R600 million ngonyaka. Kuthiwa emalini ekhishwa ngumuntu ukukhokhela ilayisensi yokushayela, cishe wu-R60 kuphela oya ezindlekweni zokukhiqiza ikhadi, enye imali iya kuhulumeni.
Siyanda nesibalo sabantu abathi makuvalwe amakhadi aphathekayo, kwenziwe ikhadi eledijithali, ukuhambisana nokuguquka kwesikhathi.
